Osy jeksenbi, iaǵni 15 qyrkúiek kúni «Habar» telearnasy Ortalyq Aziiadaǵy eń aýqymdy joba - Central Asia’s Got Talent (Ortalyq Aziia talanttardy izdeidi) shoýyn kórermen nazaryna usynady, dep habarlaidy "Ult aqparat".
Alǵash ret Qazaqstan, Qyrǵyzstan, Ózbekstan jáne Tájikstannyń ónerpazdary bir sahnada baq synaidy. Jeńimpaz 10 million teńge qarjylai syilyqqa ie bolady.
«Talanttar shoýynyń tusaýkeseri jeksenbige josparlanǵan jáne kórermender taǵatsyzdana kútip júrgenine senimimiz mol. «Habar» agenttigi osynaý biregei jobanyń bastamashysy boldy, sondyqtan biz, bul baiqaý - Qazaqstan, Qyrǵyzstan, Ózbekstan jáne Tájikstan elderiniń kórermenderi úshin kóptegen jańa talantty adamdardy ashady jáne tanytady dep oilaimyz. Álemdegi eń tanymal format endi bizdiń aimaǵymyzda» - deidi «Habar» telearnasynyń Baǵdarlamalar direktory Aikúmis Seksenbaeva.
Central Asia’s Got Tale 5 kezeńnen turady. Irikteý, ashyq tyńdalym, shirek final, jartylai final jáne Grand final. Jobanyń Bas jeńimpazynan bólek, tórt elden jeńimpaz anyqtalyp, qarjylai syilyqqa ie bolady. Shoý tórt memlekette «Habar», «Zoʻr TV», «KTRK» jáne «TV Safina» telearnalarynan kórsetiledi.
Baiqaýǵa Nurlan Abdýllin (Qazaqstan), Gúlnur Satylǵanova (Qyrǵyzstan), Sitora Farmonova (Ózbekstan) jáne Alovýddin Abdýlloev (Tájikstan) tórelik etedi.
Central Asia’s Got Talent shoýynyń júrgizýshileri: Kýmar Lýkmanov, Erkebulan Myrzabek (Qazaqstan), Erkin Ryskýlbekov (Qyrǵyzstan), Behrýz Nasriddinov (Tájikstan) jáne Timýr Aliev (Ózbekstan).
Got Talent – Fremantle britandyq kompaniiasynyń formaty. Avtory Saimon Koýell. 2006 jyldyń maýsym aiynda telebaiqaý «America’s Got Talent» degen atpen Amerikada jaryqqa shyqty. Osy ýaqytqa deiin litsenziia arqyly format álemniń 70 elinde júzege asyrylǵan. 2014 jyldyń sáýir aiynda Got Talent álemdegi eń sátti televiziialyq format retinde Ginnesstiń rekordtar kitabyna endi. Dál sol kezde telebaiqaýdyń franshizasy álemniń 58 elinde kórsetilgen.
