«Habar» telearnasy kórermenderine ene men kelin arasyndaǵy qarym-qatynasty sýretteitin jańa kartina usynady. Qańtar aiynan bastap kórsetiletin komediia «Kelinjan» dep atalady, dep habarlaidy QazAqparat.
Kartinanyń oqiǵa jelisi boiynsha Kúlimhan apanyń úsh ul, bir qyzy bar. Uldardyń kenjesi úige kelin alyp keledi. Qalada ósken Asylym esimdi arý aýyl ómirine úirenip, enesine unaǵysy keledi. Alaida Kúlimhan apaidyń minezi aýyr, muny aýyldaǵy ár adam biledi. Sondyqtan bolar oǵan eshkim jaqpaidy, kelinderiniń biri de qatal eneniń kóńilinen shyqpaidy. Sondai kúnderdiń birinde Kúlimhan apanyń óz qyzy turmysqa shyǵady. Qyzy ózge úidiń tútinin tútetip, kelin atanǵan kezde qatal eneniń kózqarasy ózgere bastaidy.
«Biz kelinniń obrazy arqyly eneniń mártebesin kórsetý nemese eneniń kelinge qatty bolýy arqyly kelinniń ez bolyp júrgenin kórsetýdi maqsat etpedik. Bul jerde árqaisysynyń óz róli, sebebi bar. Eneniń sondai bolýyna ne áser etti, nege bizdiń enelerimiz qatal, nege bizdiń kelinderimiz sondai degen suraqtarǵa jaýap beremiz. Kelispeitinderde bolýy múmkin, biraq ár adam ózin kóredi. Men oǵan senimdimin, óikeni men kúndelikti kórip júrgen dúnielerdi jazdym», - deidi kartinanyń prodiýseri Gúlnur Mamasaripova.
Teleserialda belgili akterlermen qatar jas, akterlik joldy endi ǵana bastaǵandar bar. Kúlimhan apanyń rólin - Leilo Beknazar Haninga oinaidy. Prodiýserdiń aitýynsha dál osy keiipkerdi uzaq izdegen, alaidy ózi tanityn, buǵan deiin jumys istegen aktrisany tańdapty. Esterińizde bolsa, Leilo Beknazar Haninga buǵan deiin «Habar» telearnasynda kórsetilgen «Ana júregi» teleserialynda basty róldi somdaǵan edi.
«Kúlimhan - meniń keiipkerim, árbir aýylda bolatyn ana, ene. Qazaqtyń ózindik dástúrleri bar, bul - ana men bala arasyndaǵy, úlkendi syilaý, kishini qurmetteý, ene men kelin arasyndaǵy qazaqy dástúrler, sonyń barlyǵy osy jerde kórinedi. Qazaqta kelin alsa, ony úi qyzmetshisi etip salyp qoiady dep aityp jatady, biraq biz (eneler) muny ol jaman bolsyn dep aitpaimyz ǵoi. Ene eshqashan óz balasy alyp kelgen kelin jaman bolsyn dep oilamaidy, ony óz qyzyndai baýyryna basady, biraq ár januianyń óz dástúri bar, soǵan aqyryndap úiretý kerek. Sol otbasyǵa tartý kerek, sol jaǵynan qyzyqty bolady dep oilaimyn», - deidi Leilo Beknazar Haninga óz obrazy jaily.
Sonymen qatar kartinadan Rústem Janamanov, Nazar Sultanbaev, Dariǵa Badyqova, Nurgúl Myńbaeva, Dáýlet Óserbaev, Sara Amangeldi syndy akterlerdi de kóresizder.
«Bizde úsh abysyn bar. Abysynnyń úlkenin Dariǵa Badyqova oinaidy. Dariǵanyń óz amplýasy bar, kórermenge jaqsy tanys aktrisa. Ortanshy abysyn - Nurgúl Myńbaeva. Onyń buǵan deiingi jumystaryn qarap shyqtyq. Al kishkentai kelin, qalada ósken qyzdy Sara Amangeldi oinaidy. Shańyraqtaǵy úsh uldyń úlkenin Rústem Janamanov, ortanshy uldy Nazar Sultanbaev oinaidy. Nazar buǵan deiin Qarasai batyrdy somdaǵan. Eki serial eki túrli, bul bir qyzyq bolaiyn dep tur. Kishkentai uldy, debiýtant, erejesiz jekpe-jekten álem chempiony Dáýlet Óserbaev somdaidy», - deidi Gúlnur Mamasaripova.
Serialdyń bir epizodynda Meirambek Bespaev aýyl mýzykanty retinde oinaidy.
Jalpy film qarapaiym qazaqstandyqtardyń kez kelgenine tanys, qyzyqty, jyly bolady deidi shyǵarmashylyq top. Al, ene men kelinder arasyndaǵy oqiǵalardyń qalai aiaqtalaryn qańtar aiynda «Habar» telearnasynan tamashalańyzdar!
