Qazaqstandyqtar besinshi kún qatarynan Erjan Maksimniń Balalar Eýrovideniesiniń aqtyq máresinde kórsetken ónerin tamsana aitýda, – dep habarlaidy «Ult aqparat».
«Habar» Agenttiginiń atynan taǵy bir márte bizdiń Erjandy bedeldi - Balalar Eýrovideniesi baiqaýynda joǵary deńgeide óner kórsetýimen quttyqtaimyn. Eýropa elderiniń ortasynda Kazaqstan eli pash etilgende bizdiń keýdemizdi qýanysh kernedi. Barlyqtaryńyz, daýys berý aiasynda, milliondaǵan aýditoriia aldynda bizdiń memlekettiń ataýy san ret atalǵanynyń kýási boldyńyzdar. Sondyqtan da, Erjandy bul baiqaýdyń naǵyz jeńimpazy dep sanaimyz» deidi «Habar» agenttiginiń basqarma tóraǵasy Erlan Bekhojin.
Eske sala keteiik, «Habar» agenttigi - is-sharany uiymdastyratyn Eýropalyq habar taratý odaǵynyń (EBU) qaýymdasqan múshesi. Bul múshelik Junior Eurovision baiqaýyna qatysý úshin elden úmitker usynýǵa múmkindik berdi.
«Bul jetistikke jetý úshin biz kóp jumys atqardyq. Baiqaýǵa qatysý múmkindigine ie bolý úshin kelissózder sharaǵa deiin, aldyn ala uzaq ýaqyt boiy júrgizildi, túbinde oń nátijege jetetinimizge bek sengen, bir-biriniń pikirimen únemi aqyldasyp, sanasyp otyratyn arnaiy uiymdastyrýshylar toby óz jumysyn tiisti deńgeide oryndady» dep atap ótti agenttik basshysy.
Bir jyl boiy agenttik atsalysady-aý degen áleýetti demeýshiler men tanymal tulǵalarmen sansyz kezdesýler men kelissóz júrgizýmen boldy.
«Ókinishke qarai, eki kompaniiadan basqa eshqaisysynan aitarlyqtai qoldaý kórmedik» dep atap ótti Bekhojin.
«Búginde Erjannyń álemdi dúr silkindirgen ónerinen keiin, qoiylymnan keiin, janashyr jáne qoldap jatqan, tipti kei jerlerde ekinshi oryn alǵany úshin syn aityp jatqan adamdardyń syrtynan baqylaý qyzyq áserge qaldyrýda. Sol adamdardyń qoldaýyn baiqaýǵa DEIIN sezsek, kórsek, biz shyn júrekten qýanatyn edik degim keledi» deidi Erlan Bekhojin.
«Habar» agenttiginiń basshysy Polshanyń Glivitse qalasynda ótken baiqaýda qara úzgen triýmfatorǵa syilyǵyn tapsyrdy.
«Erjan Polshaǵa jol júrer aldynda «Habardaǵy» kezdesýlerdiń birinde men «Eýrovideniedegi jeńisi úshin onyń armandaǵan syilyǵyn alyp beremiz» degen bolatynmyn. Ózderińiz kórip turǵandai, biz óz ýádemizde turdyq» dep sózin aiaqtady ol.
