- Qostanai oblysynyń ákimi Arhimed Muhambetov Amangeldi aýdany men Arqalyq qalasyna bardy, dep habarlaidy atalǵan óńir ákimdiginiń baspasóz qyzmeti.
Jumys saparynyń aiasynda óńir basshysy Amangeldi aýdanynyń Tasty aýyly mańynda ornalasqan Keiki batyr (Nurmaǵambet Kókembaiuly) kesenesine baryp shyqty.
Esterińizge sala keteiik, QR Úkimetiniń tapsyrmasymen batyrdyń dene súiekterin saltanatty jerleý boiynsha is-sharalar josparlanǵan. Qazirgi ýaqytta bas súiektiń genetikalyq saraptamasy jáne ańyzǵa ainalǵan qazaq mergeniniń beinesin qalpyna keltirý boiynsha jumystar júrgizilýde. Kelesi jyly kóktemde Mádeniet jáne sport ministrligi Keiki batyrdyń denesin izdestirý jóninde ekspeditsiia uiymdastyrýǵa bastamashyldyq jasaityn bolady. Bizge belgilisi, onyń dene súiekterin jerleýdiń boljamdy orny da Amangeldi aýdanynyń Jalaýly jerinde.
Munymen qosa, Qostanai oblysynyń ákimdigi Keiki batyrdyń dene súiekterin jerleýge daiyndyq jóninen uiymdastyrýshylyq jumysyn júrgizip jatyr.
Arhimed Muhambetovtiń atap ótkenindei, qazirgi ýaqytta elimizdiń tanymal sáýletshileri memorialdyq keshen nobaiyn ázirleýde. Nobaidyń tańdaýly nusqasy aiqyndalǵannan keiin oblys jobalaý-smetalyq qujattamasyn ázirleýge kirisedi, al aldaǵy jyldyń mamyrynda onyń qurylysyn bastaý josparlanyp otyr. Memorial batyrdyń urpaqtary saldyrǵan qazirgi shaǵyn keseneden qashyq emes jerde ornalastyrylatyn bolyp sheshildi.
«Jańa memorialdyk keshenniń qurylysy boiynsha barlyq jumystar aldaǵy jylǵy tamyzda aiaqtalatyn bolýǵa tiis. Qyrkúiekke, Úkimetpen kelisim boiynsha, saltanatty is-sharany jáne dańqy jaiylǵan batyrdyń súiekterin jerleýdi josparlaityn bolamyz», - dep atap ótti Arhimed Muhambetov.
Arqalyqta oblys ákimi áleýmettik obektilerine baryp shyqty, qalany abattandyrý barysymen tanysty.
«Aldaǵy jyly qalanyń ákimdigi Keiki batyrdyń súiekterin jerleý aiasyndaǵy is-sharalarǵa daiyndyq jóninen úlken jumys tyndyrýǵa tiis. Bul qalanyń infraqurylymyn jaqsartýǵa, birqatar áleýmettik obektilerin tártipke keltirýge múmkindik beredi. Osy maqsatpen barlyq is-sharalardy tap osy Arqalyqta ótkizýge sheshim qabyldanǵan bolatyn», - dep atap ótti oblys ákimi oblystyń jáne qalanyń basshylyǵy qatysqan jumys keńesinde.
2017 jyly Mádeniet saraiy men usynylǵan eksponattary boiynsha elimizdiń 10 tańdaýly mýzeiiniń biri bolyp sanalatyn oblystyq Dala ólkesi tarihy mýzeiine kúrdeli jóndeý jasalatyn bolady.
Qalanyń negizgi - Demchenko, Qaiyrbekov, Baitursynov, Abai kóshelerin jóndeýge 600 mln teńgeden astam qarjy baǵyttalady. Sondai-aq Áýliekól-Jaldama jolyn ortasha jóndeý josparlanǵan.
«Bul qalanyń jalpy infraqurylymyn jaqsartýǵa múmkindik beredi. Basty nazar qala turǵyndaryna uzaq jyldar boiy qyzmet etetin jumys túrlerine aýdarylǵany jón. «Kórkeie ber, Qostanai» aktsiiasynyń aiasynda qala kásipkerleri abattandyrýǵa qatysýǵa tiis - óz ǵimarattaryna jóndeý júrgizsin, olardyń qasbetterin jaqsartsyn, irgeles aýmaqtaryn tártipke keltirsin», - dedi Arhimed Muhambetov.
