Elimizdegi keibir oqý oryndarynda eskirgen ádebietter usynylǵan. Bul jóninde Ortalyq kommýnikatsiialar qyzmetinde Qazaqstandaǵy joǵary oqý oryndaryndaǵy bilim berý baǵdarlamalary reitingisiniń ekinshi kezeńine qatysty ótken brifing barysynda logistika boiynsha sarapshy Jarqyn Baipaqbaev málimdedi, dep habarlaidy Baq.kz tilshisi.
«Elimizdegi birqatar joǵary oqý oryndaryndaǵy kólik-logistikalyq mamandyqtar boiynsha bilim berý baǵdarlamalaryna taldaý júrgizý kezinde birshama kemshilikter anyqtaldy. Bilim berý baǵdarlamalarynyń barlyǵy jumys berýshiniń talaptaryna sáikes keledi dep oilamaimyn. Biz baǵalaý kezinde bilim berý baǵdarlamasynyń taqyrypqa sai bolýy, maqsaty men mazmunynyń tereńdigi, usynylǵan ádebietterdiń zamanaýi bolýy, jańashyldyqtarǵa úilesimdiligin qarastyrdyq. Jalpy, logistika mamandyǵy tájiribege baǵyttalǵan mamandyq bolyp sanalady. Erteńgi kúni-aq logistika mamandaryna degen suranys óte joǵary bolady. Sebebi, elimizdiń aýmaǵy óte úlken, onyń tranzittik áleýeti joǵary», - dedi Baipaqbaev.
Sarapshy bilim berý baǵdarlamalaryn baǵalaý kezinde anyqtalǵan birqatar kemshilikterge de naqty toqtaldy.
«Keibir joǵary oqý oryndarynyń qujattary tolyq emes. Keibiriniń sillabýsy joq, keibirinde elektivti mamandyqtar boiynsha katalog joq, katalog bar bolsa, maqsaty men mazmuny qaitalanǵan. Sondyqtan, aralas ári bir-birine jaqyn mamandyqtardy qarastyrý kezinde bir-biri qaitalaýy kóp boldy. Sonymen qatar, belgilengen ýaqyttyń tym kóp bólinýi kezdesedi. Mysaly, kommertsiialyq logistika men taratý jáne qamtamasyz etý logistikasy boiynsha kreditter sany birdei, mazmuny da bir-birine uqsaidy. Ekeýine de úsh kreditten bólingen. Bul stýdentter úshin aýyr júkteme bolyp ketedi. Sony qysqartqan jón. Sonymen qatar, logistika mamandyǵy úshin keis-ádisterdi de engizý kerek. Olar múlde qarastyrylmaǵan. Kei joǵary oqý oryndarynda eskirgen ádebietter usynylǵan. Zamanaýi jaqsy jýrnaldar, internet-resýrstarǵa silteme jasalmaǵan. Osyny da eskerý kerek. Aqparat pen tehnologiia zamamynda bul stýdentter úshin asa mańyzdy. Stýdentterdiń aǵymdaǵy ózgeristerge óte jyldam ikemdelýi mańyzdy bolyp tabylady», - dedi spiker.
