Foto: primeminister.kz
Premer-Ministr Álihan Smaiylovtyń tóraǵalyǵymen ótken jańa jyldaǵy birinshi Úkimet otyrysynda Qazaqstandaǵy qazirgi sanitariialyq-epidemiologiialyq ahýal qaraldy, dep habarlaidy "Ult aqparat" primeminister.kz saityna silteme jasap.
Densaýlyq saqtaý ministri Ajar Ǵiniiattyń aitýynsha, 2023 jyldyń qorytyndysy boiynsha juqpaly aýrýlar boiynsha epidemiologiialyq ahýal turaqty bolyp qaldy. Aldyn alý sharalarynyń arqasynda 20 asa qaýipti juqpaly aýrý tirkelgen joq, olardyń arasynda oba, tyrysqaq jáne poliomielit bar. Sondai-aq 39 infektsiia boiynsha, onyń ishinde koronavirýs, rotavirýs jáne jiti ishek infektsiialary boiynsha syrqattanýshylyq tómendedi.
Qazirgi ýaqytta jiti respiratorlyq infektsiialarmen syrqattanýdyń kezekti maýsymy júrip jatyr, ol jyl saiyn qazannan mamyrǵa deiin sozylady. Aldyn alý maqsatynda ótken jyly qaýip-qater tobyna jatatyn 2,4 mln adam tumaýǵa qarsy ekpe aldy, bul halyqtyń 12%-yn quraidy. Bul rette DDSU usynatyn deńgei keminde 10%-dy quraidy.
Jalpy epidemiologiialyq maýsym bastalǵaly beri statsionarlarda 31 myńnan astam naýqas emdeldi, 2 mln-nan astam naýqas ambýlatoriialyq em aldy. El boiynsha barlyǵy 10 myńǵa jýyq infektsiialyq tósek-oryn qoiyldy, olardyń ishinde balalar úshin shamamen 3 myń tósek-oryn qarastyrylǵan.
COVID-19 pandemiiasynyń aiaqtalýyna qaramastan, tiisti baqylaý jalǵasyp jatyr. Qazaqstanda koronavirýstyq infektsiia boiynsha jaǵdai turaqty. Sońǵy jarty jylda ai saiyn 100-den 400-ge deiin jaǵdai tirkelgen, bul koronavirýstyń jyl boiy taralatynyn rastaidy.
2023 jyldyń sońynda elde 29 myńnan astam qyzylsha juqtyrý jaǵdaiy tirkeldi, onyń 80%-y 14 jasqa deiingi balalarǵa tiesili. 1 qańtardan bastap 1 674 qyzylshamen syrqattanýshylyq tirkeldi. Jaǵdaidy turaqtandyrý úshin ótken jyly jospar boiynsha vaktsinalaý júrgizildi, nátijesinde alty jasqa deiingi 700 myńǵa jýyq bala ekpe aldy.
Oǵan qosa Úkimet rezervinen qarajat bólinip, qyzylshaǵa, qyzamyqqa jáne parotitke qarsy 1,5 mln doza vaktsina satyp alyndy. Búgingi tańda qosymsha vaktsinalaý aiasynda 930 myńnan astam adam ekpe aldy, kún saiyn 20 myńnan astam adam vaktsina alýda.
Óńirlerde qyzylshaǵa qarsy immýnizatsiiany kúsheitý jónindegi sharalar týraly Qaraǵandy oblysynyń ákimi Ermaǵanbet Bólekpaev pen Qostanai oblysynyń ákimi Qumar Aqsaqalov aityp berdi.
Premer-Ministr monitoring qorytyndysy boiynsha ótken jyly eń qaýipti infektsiialarmen aýyrǵan naýqastar tirkelmegenin aitty. Bul rette keń taralǵan virýstyq infektsiialar boiynsha da kórsetkishter tómendedi.
«Tek ótken jyldan beri elimizde qyzylshamen aýyrǵandar sany aitarlyqtai ósip ketti. Ol sońǵy 10 jylda bolmaǵan kórsetkishke jetip otyr. Olardyń 80%-ǵa jýyǵy – 14 jasqa deiingi balalar. Aýyrǵandardyń kópshiligi – tiisti ekpe almaǵandar», — dedi Álihan Smaiylov.
Sonymen qatar Úkimet basshysy ekpe almaǵan naýqastardyń aýrýy asqynyp ketý qaýpi joǵary ekenin aitty. Degenmen ata-analardyń arasynda balalaryna ekpeni ádeii salǵyzbai, bas tartyp otyrǵandardyń qatary az emes, munyń sońy aýyr zardaptarǵa alyp kelýi múmkin.
«Jaǵdaidy turaqtandyrýdyń jalǵyz joly – ekpe salý. Qyzylshaǵa qarsy jappai immýnizatsiia júrgizý úshin qosymsha 1,5 mln doza vaktsina satyp alyndy. Osy maqsattar úshin Úkimet ótken jyldyń qyrkúiek aiynda rezervten 3 mlrd teńgeden astam qarajat bóldi. Alaida, kórip otyrǵanymyzdai, keibir óńirlerde qyzylshaǵa qarsy immýnizatsiiamen qamtý deńgeii áli de tómen», — dedi Premer-Ministr.
Osyǵan bailanysty Álihan Smaiylov qyzylshaǵa qarsy vaktsinalaý jumystaryn kúsheitýdi, sondai-aq basqa da profilaktikalyq ekpelermen vaktsinalaýdy jandandyrýdy tapsyrdy.
«Jol qatynasy qiyn jáne shalǵaidaǵy aýyl turǵyndaryn vaktsinalaý úshin jaǵdai jasaý kerek», — dedi Úkimet basshysy.
Sondai-aq Úkimet basshysy meditsina qyzmetkerleriniń jaýapkershiligin arttyra otyryp, ásirese aýyldyq jerlerge jetkizý kezinde vaktsinalardy saqtaý men tasymaldaýdyń tiisti rejimin qamtamasyz etý qajettigin aitty.
«Baspasózde jáne áleýmettik jelilerde vaktsinatsiiaǵa qatysty ádeii jalǵan aqparattyń taralýyna monitoring júrgizip, olardyń aldyn alý kerek. Ýchaskelik deńgeidegi meditsina qyzmetkerleri ata-analarǵa profilaktikalyq ekpeniń balalar úshin mańyzdylyǵy men qaýipsizdigi týraly túsindirý jumystaryn júrgizýi tiis», — dep túiindedi Premer-Ministr.
