Parlament Májilisiniń depýtattary «QR keibir zańnamalyq aktilerge jarnama máseleleri boiynsha ózgerister men tolyqtyrýlar engizý týraly» zań jobasyn ekinshi oqylymda maquldady, dep habarlaidy QazAqparat tilshisi.
Palatanyń áleýmettik-mádeni damý komitetiniń tóraiymy Gúlnar Iqsanova atap ótkendei, zań jobasy boiynsha bes kodeks pen toǵyz zańǵa ózgerister men tolyqtyrýlar engizý kózdelip otyr.
«Jumys barysynda depýtattar syrtqy (kórneki) jarnamalar termini men syrtqy (kórneki) jarnama nysandarynyń naqty anyqtamasy, kóshe jihazy túsinigin engizý, qurylǵy, sonymen qatar syrtqy jarnamaǵa jatpaityn aqparattardyń túrlerin anyqtaýǵa baǵyttalǵan ózgeristerdi engizdi. Jarnama salasyn retteitin memlekettik organdardyń jáne jergilikti atqarýshy organdardyń quziretterin naqty bólý qarastyrylǵan», - dedi Gúlnar Iqsanova.
Sonymen qatar, onyń aitýynsha, zań jobasy negizinde baqylaý fýnktsiialaryn júzege asyratyn, onyń ishinde syrtqy (kórneki) jarnamany ornalastyrýǵa habarlama alatyn naqty sýbektilerdi aiqyndaýǵa baǵyttalǵan túzetýler engizilgen. Bul fýnktsiialar respýblikalyq mańyzy bar qalalardyń, astananyń, oblystyq mańyzy bar qalalardyń jáne aýdandardyń jergilikti atqarýshy organdarynda bekitiledi.
«Bul rette avtokólik joldaryn basqarý jónindegi ulttyq operatordyń fýnktsiialary syrtqy (kórneki) jarnama nysandaryn halyqaralyq jáne respýblikalyq mańyzy bar jalpyǵa ortaq paidalanylatyn avtokólik joldarynyń bólingen beldeýinde ornalastyrýdy kelisý máselelerimen ǵana shekteledi. Zań jobasy QR Jer kodeksine, QR sáýlet, qala qurylysy jáne qurylys qyzmeti, avtokólik joldary men jol júrisi týraly zańnamaǵa sáikes syrtqy (kórneki) jarnama nysandaryn ornalastyrý jónindegi talaptardy aiqyndaýǵa múmkindik beredi. Sondai-aq, ol menshik ielerin ǵimarattarynyń syrtqy jaǵyna ornalastyrylǵan syrtqy jarnama obektilerine tiisti estetikalyq, sanitariialyq jáne tehnikalyq jaǵdaida ustaý, adamdar men olardyń densaýlyǵy, menshiktiń barlyq nysanyndaǵy múlik úshin syrtqy jarnama nysanynyń qaýipsizdigin qamtamasyz etýdi mindetteidi», - deidi ol.
Sonymen qatar, komitette atap ótkendei, zań jobasy boiynsha 2019 jyldyń 1 qańtarynan bastap keshki ýaqytta jarnamalardy qysqartý kózdelgen. Naqtyraq aitqanda, keshke qarai teledidar men radioda kommertsiialyq jarnamalardyń mólsherin qysqartý josparlanýda. Qysqartý kezeń-kezeńimen iske asyrylady.
«Zań jobasy negizinde 2019 jyldyń 1 qańtarynan bastap jarnamalardyń mólsherin 20 paiyzǵa azaitý usynylyp jatyr», - delingen komitettiń sheshiminde.
