Kentaý qalasyn tabiǵi gazben qamtý jumystary Túrkistan qalasyn gazdandyrý tásilimen júzege asatyn bolady. Osy maqsatta arnaiy jumys toby qurylmaq. Jyl sońyna deiin shahardy 30 paiyz gazben qamtý josparlanǵan. Oblys ákimi Ómirzaq Shókeevtiń tóraǵalyǵymen ótken aptalyq apparat otyrysynda Kentaý ákimi rashid Aiýpov Kentaýdaǵy ózekti máseleleri týraly baiandady, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Aýyz sý jáne káriz júiesimen, jylýmen qamtamasyz etý máseleleri de kún tártibinde tur. Kentaý qalasyndaǵy aýyz sý qubyrynyń jalpy uzyndyǵy - 469 shaqyrym. Káriz júiesi - 100 shaqyrymǵa jýyq. Májiliste tozyǵy jetken qubyrlardy aýystyrý máselesi talqylandy. Kóp qabatty úilerdiń aýlalaryn abattandyrý, iaǵni balalar oiyn alańshalary men sport alańshalaryn ornatý máselesi de ortaǵa salyndy.
Qazirgi ýaqytta Kentaý qalasynyń jer asty sýlarynyń deńgeiin tómendetý maqsatynda «Keńsai-Qosqorǵan» sý qoimasyn odan ári tolyqtyra otyryp, Kentaý qalasynda sý tómendetý júiesin salý boiynsha II kezeńnen turatyn jobasyn iske asyrý jumystary júrgizilýde. Qalany sý basýdyń aldyn alý boiynsha jobalaýdyń ekinshi kezeńi tórt derbes jumys jobasyn qamtidy.
Aýqymdy joba aiasynda Myrǵalymsai ken ornynyń jer asty sýlarynyń qazbalaryna súzilý jáne qulamaýdyń aldyn alý úshin «Keńsai-Qosqorǵan» sý qoimasyna tasqyn sýlardy burý úshin Hantaǵy ózeninde sý toraby salynady. Sondai-aq aryq júiesin qalpyna keltirý arqyly Kentaý qalasyndaǵy mikroklimatty ustap turý úshin sýdy tómendetý júiesiniń sýy ishinara paidalanylady. Qosymsha Kentaý jáne Túrkistan qalalary aimaqtaryn sýarmaly sýmen qamtamasyz etý qarastyrylǵan.
