Túrkistan oblysynyń ákimi Ómirzaq Shókeev Kentaý qalasyna kezekti jumys saparynda jańadan iske qosylǵan kirpish zaýytynyń jumysymen tanysty. Óndiris oshaǵy qaladaǵy arnaiy ekonomikalyq aimaǵynda boi kótergen. Mańyzdy jobany «Almaty NS Group» JShS júzege asyryp otyr, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Zaýyt aiyna 3 mln. dana keramikalyq kirpish shyǵarady. Kásiporyndy salyp, qajetti qondyrǵylarmen qamtýǵa 1 mlrd. 720 mln. teńge investitsiia quiylǵan. Joba júzege asyrylǵannan keiin jylyna 45 mln. dana kirpish shyǵarý kózdelip otyr. Kásiporynnyń qurylysy 2021 jyly bastalǵan. Búginde qurylysqa qajet materialdarmen qamtylyp, óndiriske kerek pesh pen qondyrǵylary ornatylǵan. Qazir kirpishtiń alǵashqy legi shyǵaryla bastady. Jalpy zaýyttyń jyldyq qýattylyǵy – 45 million dana. Mamandardyń aitýynsha, aldaǵy birneshe jylda kirpish óndirisi jylyna 4-5 paiyzǵa óspek. Zaýytta 50 adam jumyspen qamtylady dep josparlanǵan.
Odan keiin óńir basshysy S.Qojanov atyndaǵy saiabaqta Kentaý turǵyndarymen kezdesip, suraqtary men ótinishterin, usynys-pikirlerin tyńdady. Biyl sáýir aiyndaǵy kezdesýde kóterilgen máselelerdiń basym bóligi sheshimin tapqanyn málimdedi.
– Biyl sáýir aiynda Kentaýǵa kelip, turǵyndardy tolǵandyryp júrgen áleýmettik jáne basqa da ózekti máselelerdi talqylaǵan bolatynbyz. Mine, búgin sizdermen qaita júzdesip, kóterilgen máselelerdiń sheshimin baiandaimyn. Jalpy halyqpen kezdesý men jeke qabyldaý barysynda 26 másele kóterildi. Onyń 15-i óz sheshimin tapty, qalǵan 11-i sheshilý ústinde. Árbir ótinish zań sheńberinde qaralyp, tiisti sheshimder qabyldanyp jatyr, – degen Ómirzaq Shókeev sol kezdesýden keiin qolǵa alynǵan birneshe mańyzdy bastamaǵa toqtaldy.
Qazirgi tańda Kentaý qalasy tabiǵi gazben qamtylyp, qala aýmaǵynda tutynýshy sanyn kóbeitý jumystary júrgizilýde, «QazTransGaz Aimaq» AQ-na 1981 tutynýshy tehnikalyq shart alý úshin ótinish bergen. Oblystyq mańyzy bar KH-56 «Jambyl oblysy shekarasy - Qumkent - Sholaqqorǵan- Ashysai - R - 31» avtomobil jolynyń 76-91 shaqyrymyna (Ashysai aýyly men Oiyq aýylynyń aralyǵy (15 shq) ortasha jóndeý jumystary júrgizilip jatyr. Jóndeý jumystary tamyz aiynda tolyq aiaqtalyp, nysan qazan aiynda paidalanýǵa beriledi. Sonymen birge turǵyndar ótininishi boiynsha Kentaý qalasy boiynsha múgedektigi bar bar azamattar 50 qolarbamen qamtyldy. 1 toptaǵy múgedektigi bar eresekterge arnalǵan kópfýnktsionaldy ámbebap kreslo arbany ótinish berýshi áleýmettik qyzmetter portalynan tańdap alǵan.
– Kentaý – óńirimizdegi jalǵyz monoqala. Qalanyń áleýmettik-ekonomikalyq damý qarqyny turaqty. Negizgi salalarda ósim bar. Halyqtyń ómir súrý deńgeii men sapasyn jaqsartý boiynsha jumystar jalǵasady. Jalpy Kentaý qalasyn tabiǵi gazben qamtamasyz etý 3 kezeńnen turady. Qala boiynsha gazǵa qosylatyn 18 000 abonent bar. Onyń ishinde: 1 kezeńmen – 11300, 2 kezeńmen – 3500, 3 kezeńmen – 3200 abonent qamtylmaq, – dedi oblys ákimi.
Búgingi tańda gazdandyrýdyń I-kezeń boiynsha jumystar tolyq aiaqtaldy. Tabiǵi gazben qamtýdyń II jáne III kezeńderi nysanynda qysymmen tekserý jumystary júrgizilýde. Ol tamyz aiynyń sońynda aiaqtalady dep josparlanǵan.
Kezdesý barysynda turǵyndar tarapynan suraqtar qoiylyp, usynystar aityldy. Árbir ótinishtiń zań aiasynda sheshiletinin aitqan Ómirzaq Shókeev kezdesýden keiin birneshe turǵyndy jeke qabyldady.
