Kentaý qalasynyń turǵyndary Qala kúnin joǵary deńgeide atap ótti, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
«Yntymaq» alańynda ótken dúbirli merekege jinalǵan turǵyndardyń qarasy qalyń. Merekelik is-sharada elge eńbegi sińgen azamattarǵa «Kentaý qalasynyń Qurmetti azamaty» ataǵy berildi. Qalanyń damýyna úles qosqan azamattar «Qalaǵa sińirgen eńbegi úshin» tós belgisi men qala ákiminiń alǵys hattarymen marapattaldy. Shahar basshysy kópshilikti quttyqtady.
«Oblys ortalyǵy – Túrkistannyń Kentaýǵa shekaralas bolýy úlken múmkindikter beredi. Osy sátke deiin qala ken óndirýmen tanylsa, endi óndirisi damyǵan qalaǵa ainalatyn bolady. Búginde jer kólemi ulǵaiǵan, halyq sany artqan Kentaýdyń ajary ashylyp, tyndyrymdy tirlikter atqarylýda. Yntymaǵy men birligi jarasqan barsha qala turǵyndaryna amandyq, otbasylaryna baqyt-bereke tileimin», – dedi qala basshysy Jandos Tasov.
Sońǵy jyldary Kentaý qalasynda jol qurylysy qarqyn alyp, kóshelerdiń 70 paiyzy asfaltanǵan. Qalada kópqabatty turǵyn úiler jóndelip, jańa on kópqabatty úi turǵyndarǵa berilgen. Biyl qalaǵa gaz qosylyp, etap boiynsha úilerge qosý jumystary atqarylyp jatyr. Qala kóshelerin tolyqtai jaryqtandyrý jumystary qolǵa alynǵan.
Saltanatty is-sharada QR Parlamenti Senatynyń depýtaty Amangeldi Tolamisov pen qazaq estradasynyń jaryq juldyzy Qairat Túntekov Kentaý qalasynyń turǵyndaryn quttyqtady.
Qala kúninde turǵyndar tanymal ánshiler men myń buralǵan bishilerdiń ónerin qoshemetpen tamashalady. Merekelik shara sońy otshashýǵa jalǵasty.
