كەنتاۋ قالاسىنىڭ تۇرعىندارى قالا كٷنٸن جوعارى دەڭگەيدە اتاپ ٶتتٸ, دەپ حابارلايدى «ۇلت اقپارات» تٷركٸستان وبلىسى ەكٸمدٸگٸنٸڭ باسپاسٶز قىزمەتٸنە سٸلتەمە جاساپ.
«ىنتىماق» الاڭىندا ٶتكەن دٷبٸرلٸ مەرەكەگە جينالعان تۇرعىنداردىڭ قاراسى قالىڭ. مەرەكەلٸك ٸس-شارادا ەلگە ەڭبەگٸ سٸڭگەن ازاماتتارعا «كەنتاۋ قالاسىنىڭ قۇرمەتتٸ ازاماتى» اتاعى بەرٸلدٸ. قالانىڭ دامۋىنا ٷلەس قوسقان ازاماتتار «قالاعا سٸڭٸرگەن ەڭبەگٸ ٷشٸن» تٶس بەلگٸسٸ مەن قالا ەكٸمٸنٸڭ العىس حاتتارىمەن ماراپاتتالدى. شاھار باسشىسى كٶپشٸلٸكتٸ قۇتتىقتادى.
«وبلىس ورتالىعى – تٷركٸستاننىڭ كەنتاۋعا شەكارالاس بولۋى ٷلكەن مٷمكٸندٸكتەر بەرەدٸ. وسى سەتكە دەيٸن قالا كەن ٶندٸرۋمەن تانىلسا, ەندٸ ٶندٸرٸسٸ دامىعان قالاعا اينالاتىن بولادى. بٷگٸندە جەر كٶلەمٸ ۇلعايعان, حالىق سانى ارتقان كەنتاۋدىڭ اجارى اشىلىپ, تىندىرىمدى تٸرلٸكتەر اتقارىلۋدا. ىنتىماعى مەن بٸرلٸگٸ جاراسقان بارشا قالا تۇرعىندارىنا اماندىق, وتباسىلارىنا باقىت-بەرەكە تٸلەيمٸن», – دەدٸ قالا باسشىسى جاندوس تاسوۆ.
سوڭعى جىلدارى كەنتاۋ قالاسىندا جول قۇرىلىسى قارقىن الىپ, كٶشەلەردٸڭ 70 پايىزى اسفالتانعان. قالادا كٶپقاباتتى تۇرعىن ٷيلەر جٶندەلٸپ, جاڭا ون كٶپقاباتتى ٷي تۇرعىندارعا بەرٸلگەن. بيىل قالاعا گاز قوسىلىپ, ەتاپ بويىنشا ٷيلەرگە قوسۋ جۇمىستارى اتقارىلىپ جاتىر. قالا كٶشەلەرٸن تولىقتاي جارىقتاندىرۋ جۇمىستارى قولعا الىنعان.
سالتاناتتى ٸس-شارادا قر پارلامەنتٸ سەناتىنىڭ دەپۋتاتى امانگەلدٸ تولاميسوۆ پەن قازاق ەستراداسىنىڭ جارىق جۇلدىزى قايرات تٷنتەكوۆ كەنتاۋ قالاسىنىڭ تۇرعىندارىن قۇتتىقتادى.
قالا كٷنٸندە تۇرعىندار تانىمال ەنشٸلەر مەن مىڭ بۇرالعان بيشٸلەردٸڭ ٶنەرٸن قوشەمەتپەن تاماشالادى. مەرەكەلٸك شارا سوڭى وتشاشۋعا جالعاستى.
