Kentaý qalasyna qarasty Qotyrbulaq eldi mekeninde «Baisal Kerim» demalys ornynda Kentaý qalasynyń ishki týrizm salasyn damytý boiynsha kóshpeli seminar ótkizildi, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Seminarda Kentaý qalasynyń týrizm baǵytyn damytý boiynsha jan-jaqty aqparattar berildi. Alǵy sózdi qala ákimi Rashid Aiýpov bastap ashyp berdi. Qala basshysy Kentaý týrizmdi damytýǵa potentsialy mol óńir ekenin atap ótti.
«Qarataý memlekettik tabiǵi qoryǵy» RMM direktory A.Niiazov qoryqtyń týristik baǵyttaǵy damýy jaiynda baiandama jasady. «Kentaý qalalyq mýzeii» MKQK direktory J.Jirenbaev Qazaqstanda ken oryndaryna arnalǵan mýzei ekeý ǵana bolsa, sonyń bireýi Kentaý qalalyq mýzeii ekenin atap ótti. Mýzeidiń búgingi tańdaǵy tynysy jaiynda málimet berdi.
Túrkistan oblysy týrizm basqarmasynyń týristik qyzmet salasyndaǵy memlekettik retteý jáne qoldaý bóliminiń basshysy D.Asanhan «Týrizm salasyndaǵy memlekettik qoldaý sharalary» taqyryby boiynsha baiandady.
«Damý» kásipkerlikti damytý qory AQ ókili N.Azizov týrizm baǵytyna beriletin nesieler men sýbsidiialar boiynsha málimet berdi. Túrkistan oblysy týrizm basqarmasynyń basshysy G.Ahberdieva «Túrkistan oblysynyń týrizm salasynyń jaǵdaiy» taqyrybynda baiandama jasasa, «Open Turkistan» JShS bas direktory A.Abdrimova Túrkistan oblysynyń týrizm salasynyń basym baǵyttaryna toqtaldy. Al Kentaý qalasy ákimdigi apparatynyń aqparattandyrý jáne memlekettik qyzmet kórsetý monitoringi bóliminiń basshysy S.Narbek Airbnb baǵdarlamasyn qoldaný jaǵy boiynsha aqparat berip ótti.
Jiynda týrizm salasyna qyzyǵýshylyǵy bar kásipkerler tarapynan suraqtar qoiylyp qajetti jaýaptar berildi. Jiyn sońynda atalmysh demalys aimaǵynyń basshysy Kerimjan Syrlybaev pen «Nad Al Shiba Investment» kompaniiasynyń ókili, iaǵni investor arasynda memorandýmǵa qol qoidy. Bolashaqta birshama adamdy jumyspen qamtityn demalys aimaǵynda 50 adamdyq qonaqúii boi kóterip, shomylý aimaǵy jáne atpen serýendeý sekildi sharalar júzege asyrylady dep kútilýde.
Jalpy, Kentaý qalasy Qarataýdyń eteginde ornalasqan tabiǵaty erekshe qala. Munda týristik baǵytta damytamyn deitin kez-kelgen janǵa múmkinshilikter kóp. Jeri qolaily óńir.
Kentaý qalasy boiynsha týristik nysandary: «Qarataý memlekettik tabiǵi qoryǵy» respýblikalyq memlekettik mekemesi, qalalyq mýzeii, Qarnaq aýylyndaǵy Shammat Ishan meshiti, 1000 jyldyq tarihy bar Tut aǵashy. Qala ákimdigi týrizm salasyndaǵy ómirsheń jáne erekshe jobalardy júzege asyrýǵa nietti investorlarmen áriptestik ornatýǵa ázir.
