Túrkistan oblysy Kentaý qalasynda baspana kezeginde turǵan 600 otbasyna jańadan salynǵan 10 ǵimarattan páter berildi. Biraq úi jylytý júiesine qosylmaǵan, - dep habarlaidy Tengrinews.kz tilshisi KTK telearnasyna silteme jasap.
Joba boiynsha jańa úiler gazben jylýy kerek, biraq ázirge gaz qubyry joq. Turǵyndardyń biri, kópbalaly ana Farida Esentaevaǵa úsh bólmeli páter berilgen. Biraq jylý júiesi joqtyǵynan, otbasy bir bólmede turyp jatyr. Páterdi jylytý úshin bir ǵana elektr jylytqysh qoldanylady.
"Alty adamǵa, úsh bólmege bir jylytqysh berdi. Ol únemi qosýly. Elektr eseptegish shydamaidy, qaita-qaita óship qala beredi. Eseptegish jyldam ainalady. Árine, bárin qaraýsyz qaldyrýǵa qorqamyz", - dedi Farida Esentaeva.
Turǵyndardyń aitynsha, úilerge gaz qubyryn kúzdiń basyna deiin júrgizemiz dep ýáde berilgen, keiin jumysty qarashaǵa qaldyrǵan. Áli kúnge deiin jylý joq, turǵyndar qala basshylyǵyna páterdi jylytý máselesimen jii júginedi.
Kentaý ákimdigi málimetinshe, gazdandyrý aiaqtalmaiynsha, páterlerdi paidalanýǵa berý josparlanbaǵan. Biraq turǵyndardyń ózderi narazylyq tanyta bastaǵan. Qala ákiminiń orynbasary Qýanysh Ysqaqovtyń aitýynsha, olar baspanany úlestirýge májbúr bolǵan.
Ákimdik ókilderi qala jaqyn arada gaz qubyryna qosylatynyn aitty. Degenmen, eki jyl buryn tartylǵan oramishilik jelilerdi jóndeý jumystary jalǵasyp jatyr. Keibir qubyrlardy tonaýshylar buzyp tastasa, endi biri isten shyqqan. Jyl aiaǵyna deiin qalany gazben qamtamasyz etý josparda bar.
