© Photo : Rixabay/Marcel
Kentaý qalasyndaǵy "Rizyq Raýany" dámhanasynda turǵyndar úshinshi ret ýlanyp jatyr, dep habarlaidy Sputnik Qazaqstan.
"Rizyq Raýany" dámhanasynda byltyr eki ret astan ýlaný jaǵdaiy tirkelgen.
"Ákimshilik quqyq buzýshylyq týraly kodekstiń 425 babyna sáikes kásipkerge 230 ailyq eseptik kórsetkish kóleminde aiyppul salynǵan", - deidi Túrkistan oblysynyń sanitariialyq-epidemiologiialyq baqylaý departamentiniń basshysynyń orynbasary Asqar Ysqaqov
Dál osy dámhanada kúzde taǵy 168 adam astan ýlanǵan.
"Ol kezde Qylmystyq Kodekstiń 304 babynyń 1 tarmaǵy "Sanitariialyq qaǵidalardy nemese gigienalyq normativterdi buzý" boiynsha sotqa deiingi tergep tekserý júrgen. Qylmystyq is byltyr 30 jeltoqsanda aiaqtaldy. Zardap shegýshilerdiń keshirim berýine sáikes qylmystyq is qysqartylǵan", - dedi Asqar Ysqaqov brifingte.
Asqar Ysqaqovtyń aitýynsha, kezinde ketken olqylyqtar sol kúii joiylmaǵan.
"Ótken jyly ýlaný boiynsha kemshilik óte kóp. Óndiristik baqylaý bolmaǵan. Dámhanalarǵa ákelinip jatqan azyq túliktiń esh qujaty, sertifikaty joq. Ókinishke orai, jeke kásipkerlik ornyn biz óz betimizben kirip tekserýge esh quqymyz joq. Qandai da bir tutynýshy tarapynan shaǵym túskende ǵana tekserý júrgiziledi", - dedi Túrkistan oblysynyń sanitariialyq-epidemiologiialyq baqylaý departamentiniń basshysynyń orynbasary.
Aita keteiik, Kentaýda astan ýlanǵandar sany 90-nan asty.
