Elordada ózin iri biznesmen retinde kórsetip, qymbat uialy telefon satýshylaryn aldap kelgen 28 jastaǵy jigit ustaldy, dep habarlaidy "Ult aqparat".
«Ol internet-saittarda uialy telefondardyń eń jańa úlgisin satatyndardy kózdegen. Kúdikti ózin qaltaly satyp alýshy retinde kórsetip, kezdesýdi keńsesinde ótkizý týraly kelisip otyrǵan. Al keńselerdi internettegi jarnamalar arqyly tapqan. Ony jalǵa alatyn bolyp, keńse mekenjaiyna kelgen. Sol ýaqytqa uialy telefon satýshysyn da kezdesýge shaqyrǵan. Keńsede alaiaq jábirlenýshilerdiń senimine kirip, óziniń sátti biznesi týraly ertegige sendirip, uialy telefon satyp alýǵa daiyn ekenin aitqan», - dep habarlaidy qalalyq Politsiia departamentinen.
Satýshy álginiń qolyna uialy telefonyn bergennen keiin, er adam aqshany alyp kelý úshin kabinetine ketken bolyp, izin sýytyp otyrǵan. Esh kúdiktenbegen satýshy sol kúii keńsede kútip qala beredi. Aldanǵanyn keiin ǵana túsingen.
Qazirgi ýaqytta jas jigit ustalyp, ýaqytsha oqshaýlaǵyshqa qamalǵan. Alaiaqtyq faktisi boiynsha, sotqa deiingi tergeý amaldary bastaldy. Onyń dál osyndai 15 jaǵdaiǵa qatysynyń bar-joǵy anyqtalýda. Aldanǵan azamattardyń sany odan da kóp bolýy ábden múmkin.
Politsiia mundai alaiaqtyqtyń qurbany bolǵan azamattardy71-62-91, 71-63-35, 8-747-620-57-93, 8-702-482-22-78 nemese 102 nómirine habarlasýdy suraidy.
