AQSh-tyń 35-shi prezidenti Djon Kennedidi óltirgen Harvi Osvald óz qylmysynan eki ai buryn MQK (KGB) qyzmetkeri bolyp keletin keńestik diplomatpen kezdesken, - dep habarlaidy RIA Novosti Ortalyq barlaý basqarmasynyń jariia etilgen materialdaryna silteme jasap.
Barlaý materialdaryna sáikes, ol kezde Mehikodaǵy keńestik elshilik telefondaryn amerikalyq arnaiy qyzmet tyńdaýǵa alǵan bolatyn. Degenmen qujatta Osvaldtiń KGB-men qandaida bir bailanysy bar nemese KGB Kennedidiń ólimine qatysty bolǵan degen joramal joq. Keńes odaǵynyń Kennedidiń ólimine qatysy bar degen boljamdy AQSh biligi ózge de paiymdaýlarmen qatar qarastyryǵan. Al Osvaldtiń KSRO-nyń Mehikodaǵy elshiligine barý sebebi munyń aldynda da aitylǵan - Osvaldpen sóilesken vitse-konsýl Oleg Nechiporenko onyń KSRO-ǵa viza berýin suraǵanyn aitqan.
"Mehikoda tyńdalǵan telefon qońyraýynan mynadai jáit belgili. 1963 jyldyń 28 qyrkúieginde Li Osvald keńes úkimetiniń elshiliginde bolyp, konsýl Valerii Vladimirovich Kostikovpen kezdesken. Bul týraly Osvaldtiń keńestik elshilikke 1 qazanda shalǵan qońyraýynan belgili bolǵan. Osvald telefon tutqasyn kótergen kúzetshiden orys tilinde búgejektep bolǵan kezdesý týraly aityp, "Vashingtonǵa joldanǵan jedelhatqa" qatysty jańalyqtar bar ma dep suraǵan. Kúzetshi onyń suraýyn tekserip, suranys joldanǵanyn jáne áli jaýap kelmegenin aitqan", - delingen Ortalyq barlaý basqarmasy (CIA) jariia etken qujatta.
Sonymen qatar, qujatta Kostikovtyń KGB agenti bolǵany aitylady.
Al Ortalyq barlaý basqarmasynyń ózge qujatynda Kennedidiń ólimi KSSR úshin shok bolǵanyn jáne AQSh prezidentiniń qurmetine shirkeýler qońyraý qaqqany da aitylǵan. KSRO úshin iadrolyq qarýy bar eldiń basshysyz qalýy tiimsiz edi, óitkeni, basshysynan aiyrylǵan kezde jaýapsyz generaldardyń biri KSRO-ǵa qarai zymyran atýy da múmkin bolatyn delinedi.
Aita keteiik, beisenbi kúni Djon Kennedidiń ólimine qatysty úsh myńnan asa qupiia qujat kópshilikke jariia etilgen bolatyn. 2018 jyldyń sońyna deiin taǵy birneshe myń qujat jariia etilmek.
Prezident Donald Tramp qoǵam Kennedidiń ólimi týraly ashyq aqparat alýǵa quqy bar degen bolatyn. Degenmen ol ulttyq qaýipsizdikke bailanysty arnaiy qyzmetke kei mátinderge túzetý jasaýǵa ruqsat etýden basqa amaly joǵyn da qosa aitqan.
