Resei Prezidenti Vladimir Pýtin Elbasy Nursultan Nazarbaevpen kezdesýinde Qazaqstan halqyna Kenesarynyń súiegin qaitarýǵa kómektesýge ýáde etti. Bul týraly Elbasynyń baspasóz hatshysy Aidos Úkibai málimdedi, dep habarlaidy Sputnik Qazaqstan.
"Elbasynyń Resei Federatsiiasyna jumys sapary aiasynda talqylanǵan máseleniń biri Qazaq halqy úshin kieli sanalatyn Kenesary hannyń súiegin izdestirý jáne ony Qazaqstanǵa qaitarý taqyryby boldy. Kelissózder barysynda Nursultan Ábishuly Resei Prezidentinen osy protseske kómek kórsetýin surady", - deidi Úkibai.
Nazarbaev qazaq halqy úshin sońǵy hannyń súiegin taýyp, onyń týǵan jerinde jerlenip, rýhynyń tynysh tabýy óte mańyzdy ekenin jetkizgen.
"Vladimir Vladimirovich Pýtin Tuńǵysh Prezidentti Resei tarapynyń bul máselede jan-jaqty kómek kórsetetinine sendirdi. Pýtinniń sózine qaraǵanda, artefakt tabylady jáne Qazaqstan halqyna qaitarylady", - dep atap ótti Elbasynyń baspasóz hatshysy.
Aita keteiik, buǵan deiin Kenesary hannyń súiegin qaitarý máselesi talai ret kóterildi. Ǵalymdar da, májilis depýtattary da aityp, úkimet deńgeiine deiin jetkizgen. Alaida sońǵy hannyń súiegi áli tabylǵan joq. Tarihshylardyń aitýynsha, Kenesary hannyń bas súiegi Sankt-Peterbýrgte ótken ǵasyrdyń 80-jyldaryna deiin Ermitajda turǵan. Ony ǵulama ǵalym Álkei Marǵulan da kórgen. Al odan keiin qaida ketkeni belgisiz. Ǵalymdar biraz mýzeidi aralap shyqqan. Biraq hannyń súiegin tappady.
2022 jyly qazaqtyń ańyzǵa ainalǵan bileýshileriniń biri Kenesary Qasymulynyń (1802-1847) týǵanyna 220 jyl tolady. Tarihi derekterde Kenesaryny 1847 jyly qyrǵyz jerindegi Kekilik-Seńgir ańǵarynda ustap, Jamby aýylynda óltirgeni, denesin sonda qaldyryp, bas súiegin Ombydaǵy Batys-Sibir aimaǵynyń general-gýbernatory, kniaz Petr Gorchakovqa aparyp bergeni aitylady.
