QR Ulttyq mýzei direktory Arystanbek Muhamediuly Kenesary hannyń bas súiegin izdeý jumystary jóninde pikir bildirdi, dep habarlaidy QazAqparat.
«Bul isti aiaǵyna deiin jetkizý kerek. Qazir jan-jaqty zerttelip jatyr, ol óte durys. Mundai tarihi qadamdy asyǵys jasaýǵa bolmaidy. Bizde odan basqa da shetelderde artefaktilerimiz bar. Máselen, Berik Ábdiǵaliulymen Sankt-Peterbýrgke barǵanda Kenesary hannyń belbeýin kórdik. Onyń myltyǵy Omby mýzeiinde tur. Eki jaqty kezdesý júrgizip, mundai qasietti dúnielerdi Qazaqstanǵa ákelýge múmkinshilik bar. Biraq ol - birkúndik dúnie emes», - dedi Muhamediuly «Uly Dalanyń jeti qyry: Sibir ulysy jáne Taibuǵa Qazaqstan tarihynda» atty ǵylymi-praktikalyq konferentsiiada tilshilerge bergen suhbatynda.
Mýzei direktory bul máselede asyǵys qadam jasamaýdyń mańyzdy ekenin basa aitty.
«Qazirgi ýaqytta bul másele tereń zerttelip jatyr. Mundai qadamdy jasap jatqan Qazaqstan ǵana. Keiki batyrdyń bas súiegin alyp kelgende ol tizim ishinde basqa memleketterdiń handarynyń, batyrlarynyń bas súiekteri jatty. Biraq, ony qaitaram dep júrgen esh memleketti kórmedik. Árine, qazaq halqy óz tarihyna qurmetpen qaraidy, óz qundylyǵyn qasterleidi. Biraq, bul máselede asyǵýdyń keregi joq, sensatsiia úshin jalǵan dúnieler jariialanyp ketse, ózge elderdiń aldynda yńǵaisyz bolady» , - dedi Arystanbek Muhamediuly.
Aita keteiik, 30 maýsym kúni Nursultan Nazarbaev Resei Federatsiiasynyń Prezidenti Vladimir Pýtinmen kelissóz júrgizdi. Kelissóz aiasynda talqylanǵan máseleniń biri – Kenesary hannyń súiegin izdestirý jáne ony Qazaqstanǵa qaitarý taqyryby boldy. Nazarbaev Resei Prezidentinen osy protseske kómek kórsetýin surady. Elbasy qazaqtyń sońǵy hanynyń súiegi óziniń týǵan jerinde jerlenip, rýhynyń tynysh tabýy qazaq halqy úshin asa mańyzdy másele ekenin airyqsha atap ótti. Vladimir Pýtin Resei tarapynyń bul máselede jan-jaqty kómek kórsetetinine sendirdi. Pýtinniń sózine qaraǵanda, artefakt tabylady jáne Qazaqstan halqyna qaitarylady.
