Foto: 2gis.kz
Májilis depýtaty Maqsat Tolyqbai áleýmettik jelidegi paraqshasynda qazirgi ýaqyttaǵy eń ózekti máselelerdiń biri - turǵyn úi taqyrybyna toqtaldy, dep habarlaidy "Ult aqparat".
"Aitaiyn degenim, turǵyndar satyp alý quqyǵynsyz jalǵa berilgen turǵyn úilerdi jekeshelendirý máselesin jii kóteredi. Rasynda, arendalyq úilerdiń sany keminde 40 myńnan asady.
Depýtattardyń bastamasymen bul másele sheshimin taýyp otyr. Qazir “Turǵyn úi saiasaty týraly” zań jobasyn jan-jaqty talqylap jatyrmyz jáne bul zańdy bizdiń komitet júrgizedi (Ekonomikalyq reforma jáne óńirlik damý komiteti).
Jalpy, respýblika boiynsha turǵyn úi kezeginde turǵandardyń sany 640 myńnan asady" - dep jazdy depýtat.
Onyń aitýynsha, 2023 jyly kezekte turǵan 8209 adam páterli boldy. Sondyqtan úi ásirese aimaqtarda kóptep salynýǵa tiis.
"Prezidenttiń tapsyrmasymen 2029 jyldyń sońyna deiin 111 mln sharshy metr turǵyn úi salý boiynsha keshendi sharalar qabyldandy.
Turǵyn úi-kommýnaldyq infraqurylymdy damytýdyń 2023-2029 jyldarǵa arnalǵan Tujyrymdamasy bekitildi, onyń sheńberinde muqtaj azamattardyń turǵyn úi máselelerin sheshý úshin Memlekettik baǵdarlamalar iske qosyldy. “7-20-25” ipotekalyq baǵdarlamasy 2029 jylǵa deiin uzartyldy, ony iske asyrýǵa jyl saiyn shamamen 100 mlrd teńge kózdelgen. Sondai-aq, kelesi jyly úi kezegine turýdyń biryńǵai bazasy jasalady.
Úleskerlerdiń de máselesi ózekti. Qurylys kompaniialaryna qoiylatyn talapty da qatańdatamyz. Qazir qurylys kodeksi ázirlenip jatyr" - dep jazdy Maqsat Tolyqbai.
