Magistratýrada endi granttar stýdentterge beriledi jáne olardyń JOO-yn tańdaý múmkindigi bolady. Bul týraly QR Bilim jáne ǵylym ministri Erlan Saǵadiev Úkimet otyrysynda aitty, dep habarlaidy Baq.kz agenttigi.
Ministr jiyn barysynda Prezidenttiń granttar sanyn kóbeitýge jáne tehnikalyq, aýyl sharýashylyǵy granttarynyń deńgeiin kóterýge qatysty tapsyrmasy oryndalǵanyn jáne joǵarǵy bilim alýǵa qol jetkizý úshin birqatar sharalar qabyldanyp jatqandyǵyn jetkizdi.
«Birinshiden, kelesi jyldan bastap UBT qańtar aiynda bastalyp birneshe ret ótkiziledi. Ekinshiden, mektep túlekterine shartty túrde qańtardan bastap aqyly negizdegi oqýǵa túsýge múmkindik beriledi. Úshinshi, JOO-da shetel azamattarynyń oqý jyly kezinde oqýǵa qabyldaý múmkindigi qarastyrylǵan. Tórtinshi, shetel azamattary úshin shákirtaqyny engizý, onyń ishinde qazaq diasporasyna. Qazaqstandyq JOO-da bilim alýǵa múmkindik berý. Besinshi, magistratýraǵa qabyldaýdyń jańa modelin engizý. Onyń negizi bakalavriatqa qabyldaý modeline uqsas. Magistratýrada endi granttar stýdentterge beriledi jáne olardyń JOO-yn tańdaý múmkindigi bolady», -dedi ol.
E. Saǵadiev osy jumystardyń nátijesinde ShQO-da shetelge oqýǵa ketetin balalardyń sany 3 ese azaiǵanyn aitty, iaǵni byltyr 1800 bala shetelge bilim alýǵa ketse, biyl ol kórsetkish 630 deiin tómendegen.
Sonymen qatar ol, Elbasynyń stýdentterdi jataqhana oryndarymen qamtamasyz etý jónindegi tapsyrmasy da oryndalyp jatqandyǵyn aityp ótti. «Ol úshin barlyq qajetti normativtik-aktiler qabyldandy, qarjylandyrý máselesi sheshildi. Keshe eń alǵashqy 7 JOO-men jáne 2 jeke menshik kompaniiamen 4 myńǵa jýyq orynǵa arnalǵan sharttarǵa qol qoiyldy. Jataqhana salý jumystary bastalyp ketti. Respýblika biýdjetiniń jobasynda aldaǵy 3 jyldyq kezeńine memlekettik tapsyrysty ornalastyrý úshin jalpy 15 mlrd teńge bólý kózdelip otyr. Jalpy 10 jyldyń ishinde 75 myń orynǵa arnalǵan jataqhanaǵa 1 53 mln teńge bólý kózdelgen», -dedi ministr.
