Kelesi jyldan bastap kei dárigerlerdiń zeinetke shyǵý jasy qysqarýy múmkin. Densaýlyq saqtaý ministrligi zańǵa osyndai ózgeris engizbek. Ol tizimge hirýrgter, akýsher-ginekolog jáne neonatologtar kiredi.
Ai-kúni jetpei týǵan náresteler men týa bitken damý kemistigi bar bóbekterge kútim jasaityn neonatolog Irina Tsýbenkonyń jumysy asa jaýapkershilikti talap etedi. Ol óz tájiribesinde 24 aptalyq shala týǵan, salmaǵy 500 gramm ǵana shaqalaqtardy da baǵyp-qaqqan, dep habarlady "Astana" arnasy.
"Bizge kóbine shala týǵan balalar túsedi. Týa salysymen bizge ákeledi. Analar sábiin eshkimge bergisi kelmeitini túsinikti ǵoi. Emotsiiaǵa beriledi. Olarmen jumys jasaý da ońai emes. Densaýlyǵynda kináraty bar nárestelerge kútim jasaý óte qiyn. Olar sóilei de almaidy. Ótken jyly biz osyndai 40-qa jýyq balany qabyldap, kútim jasap shyǵardyq", - deidi Irina Tsýbenko.
Osyndai psiho-emotsionaldyq turǵyda jumysy aýyr dárigerlerdiń zeinetke erte shyǵý múmkindigi bolýy kerek, deidi ministrliktegiler. Tipti zańǵa ózgerister engizýdi qarastyryp otyr. Biraq, erterek zeinetke shyǵý úshin, dárigerdiń zeinetaqy qorynda aqshasy jetkilikti bolý kerek. Onda ai saiyn tiisti 10 paiyzdan bólek, qosymsha qarajat salýǵa týra keledi.
Biryńǵai jinaqtaýshy zeinetaqy qorynyń dereginshe, búginde erkekter 9,1 million teńge qormen 55 jastan, al áielder 13 million teńgemen 51 jastan zeinetke shyǵa alady.
"Buryn KSRO kezinde jumysy aýyr dárigerlerge mundai múmkindik berilgen. Zeinetaqy qorynda aqshasy jetkilikti bolsa, biz 55 jastan demalysqa shyǵýdy usynyp otyrmyz. Jumys ótili de mańyzdy. Qansha jyl bolýy keregi qazir talqylanyp jatyr", - dep túsindirdi QR DSM Densaýlyq saqtaýdy damytý RO menedjment ortalyǵynyń basshysy Saltanat Ydyrysova.
