© Photo: pixabay.com
Mádeniet jáne aqparat vitse-ministri Daniiar Qadyrov kelesi jyly qandai petitsiialar oblystyq jáne respýblikalyq deńgeide qaralatynyn túsindirdi, dep habarlaidy Sputnik Qazaqstan.
Biyl 2 qazanda Prezident "Qoǵamdyq baqylaý týraly" Zańǵa qol qoidy. Zań alty aidan keiin, iaǵni kelesi jyly 4 sáýirde kúshine enedi. Zańda petitsiia institýty rettelgen.
"Petitsiiany e-ótinishtiń modýli retinde elektrondy formatta, sondai-aq jazbasha túrde de berý múmkindigi qarastyrylǵan. Eń basty novella – petitsiianyń qarastyrylý shekteri. Petitsiiany qarastyrý shegi – 2,5 myńnan 50 myń adamǵa deiin", - dedi Qadyrov Ortalyq kommýnikatsiialar ortalyǵynda ótken baspasóz máslihatynda.
Aitýynsha, petitsiiany aýdan ákimdigi qaraý úshin 2,5 myńnan astam qol jinaý qajet. Al aýdandyq máslihat qaraý úshin 5 myń adamnyń qoldaýy kerek.
Oblystyq deńgeide qarastyrylatyn petitsiia úshin oblys halqynyń 1 paiyzynan astamynyń qoly qajet. Eger oblys turǵyndarynyń 2 paiyzy qoldasa, onda oblystyq máslihat qaraidy.
Al petitsiiany qoldaýshylar sany 50 myń adamnan assa, ol Úkimet deńgeiinde qaralady.
Vitse-ministrdiń aitýynsha, e-ótinish aqparattyq júiesinde bólek modýl bolady. Sol jerde jariialanǵan petitsiialar qarastyrylady.
"Qazirgi tańda respýblikada bes-alty petitsiia berý núktesi bar. Biraq olar zańdy emes. Olar – jeke adamdardyń shyǵaryp otyrǵany. Olar zańmen rettelmegen, sol sebepti qarastyrylmaidy", - dep túsindirdi Qadyrov.
Halyq petitsiia arqyly sheneýnikterdi otstavkaǵa jiberýdi talap ete ala ma?
"Ondai qarastyrylmaidy. Zańda qandai máseleler petitsiiada qaralmaityny týraly 17 tarmaqsha bar. Prezident pen Parlamenttiń qyzmetke taǵaiyndaityn adamdaryna petitsiia qarastyrylmaidy. Óitkeni ol Parlament pen Prezidenttiń quzyretine kiredi. Soǵan bailanysty olar qarastyrylmaidy", - dep atap ótti Qadyrov.
Sondai-aq qazaqstandyqtar respýblikalyq basqarý nysanyn, ákimshilik-aýmaqtyq qurylymdy, shekarany ózgertý, sot tóreligi, raqymshylyq, ulttyq qaýipsizdik, til máselesi jáne taǵy basqalary boiynsha petitsiia bere almaidy.
Vitse-ministrdiń sózinshe, petitsiiany qaraý barysynda memlekettik organ birqatar is-shara júrgizedi: jumys toptaryn qurady, qoǵamdyq talqylaý jasaidy, halyqaralyq tájiribeni zerdeleidi. Sodan keiin ǵana baryp sheshim shyǵarady.
"Petitsiia boiynsha sheshimdi tek memlekettik organnyń birinshi basshysy ǵana bere alady. Shekti mánge jetpegen petitsiialar úndeý retinde qarastyrylyp, ákimshilik rásimdik kodeks boiynsha qaralady", - dedi ol.
