2024 jyly Parijde ótetin Olimpiada oiyndarynyń Uiymdastyrý komiteti saitynda bekitilgen sport túrleriniń tizimin jariialady, dep habarlaidy "Ult aqparat" Sports.kz-ke silteme jasap.
Osylaisha, tizimnen karate, beisbol jáne softbol alynyp tastaldy.
Olardyń ornyna Oiyndar qataryna breik-dans, sonymen qatar sporttyq quzǵa shyǵý, skeitbording jáne serfing qosylady.
Sońǵy úsh sport túrin Halyqaralyq olimpiada komiteti Tokioda ótken Olimpiada oiyndarynyń baǵdarlamasyna qosqan bolatyn.
Uiymdastyrý komiteti bul sheshimniń naqty ekenin jáne endi ózgermeitinin málimdedi. Tańdaý jasarda komitet áleýmettik jelilerdegi sport túrleriniń jastar arasyndaǵy tanymaldylyǵyna saraptama jasady.
Degenmen Búkilálemdik karate federatsiiasy bul sport túriniń ári qarai Oiyndar tiziminde qalýǵa laiyqty ekenin málimdedi.
«Biz álemge karateniń biregei sport túri ekenin dáleldep, Olimpiada baǵdarlamasyna turaqty sport túri retinde qosylýǵa laiyqty ekenimizdi kórsettik. Karate Olimpiadaǵa álem boiynsha sport jankúierleri baǵalaityn qundylyqtardy ákeldi», - dedi WKF prezidenti Antonio Espinos.
Oiyndar tiziminen karateni alyp tastaý sheshimine Olimpiada chempiony Stiven da Kosta qarsylyq bildirdi. Ol 37 kilogramǵa deiingi salmaqta jeńimpaz atanǵan.
«Men kóp jattyqtym. Favorit atandym. Frantsiiaǵa altyn ákeldim. Men týdy joǵary kóterdim. Sol úshin de óte baqytty boldym. 2024 jyly sizderdiń qoldaýlaryńyzben Parijde titýlymdy qorǵaǵym keledi», - dep jazdy sportshy Twitter-de.
Eske sala keteiik, karate alǵash ret Olimpiada baǵdarlamasyna Tokiodaǵy oiyndarda qosyldy. Bul otandyq karateshiler Darhan Asadilov pen Sofia Berýltsevaǵa Qazaqstan úshin eki qola alyp kelýge múmkindik berdi.
