Qazirgi tańda 5 millionǵa jýyq qazaqstandyq áleýmettik sala arqyly qamqorlyq alady. Bul týraly elordada «Áleýmettik qorǵaý júiesindegi úzdik jumysshysy» respýblikalyq baiqaýynyń jeńimpazdaryn marapattaý rásiminde QR Premer-ministriniń orynbasary Berdibek Saparbaev aitty, dep habarlaidy "Ult aqparat".
Baiqaýda Qazaqstannyń ár óńirinen kelgen 9 adam jeńimpaz atandy.
«Árbir adamnyń maqsaty, armany - qasyndaǵylarǵa kómektesip, olardyń alǵysyn alyp, jaǵdaiyn jasaý. Áleýmettik qyzmetkerler eńbektegen baladan eńkeigen qariiaǵa deiin kómektesip, olarǵa ýaqytyn, densaýlyǵyn aiamaidy. Men Qazaqstan úkimeti atynan sizderge úlken rahmet aitam», - deidi QR Premer-ministriniń orynbasary Berdibek Saparbaev.
Ol memlekettiń saiasaty - ár ýaqytta halyqtyń jaǵdaiyn, turmysyn jaqsartyp, áleýmettik salaǵa kóńil ekendigin aitty.
«Qazirgi tańda 5 millionǵa jýyq qazaqstandyq áleýmettik sala arqyly qamqorlyq alady. Biyl áleýmettik salaǵa bólingen qarajat 3,4 trillion teńge. Biz bul jumysty ári qarai jalǵastyrýymyz kerek. Kelesi jyldan bastap áleýmettik portaldy iske qosatyn bolamyz. Sondaǵy eń negizgi másele - múmkindigi shekteýli azamattarǵa kerekti qural-saiman, jabdyqtardy memlekettik satyp alýsyz alyp berý», - deidi ol.
Sondai-aq, QR Premer-ministriniń orynbasary barlyq Qazaqstannyń áleýmettik kartasy daiyndalǵanyn aitty.
«Soǵan qarap elimizdegi eń muqtaj adamdarǵa kómektesemiz. Odan keiin múmkindigi shekteýli azamattarǵa ońaltý ortalyǵyn salý kerek. Keleshekte árbir oblys, aýdan ortalyqtarynda sondai ońaltý ortalyqtary bolsyn degen maqsatymyz bar. Elimizde 224 áleýmettik joba bar, bul jobany jeti jyl buryn bastaǵanda 50 ǵana joba bolǵan. Eńbek etkisi kelgen adamǵa elimizde qoldaý jáne ártúrli memlekettik baǵdarlamalar bar», - deidi ol.
2011 jyly QR Prezidentiniń jarlyǵymen qazan aiynyń sońǵy jeksenbisi «Áleýmettik júie qyzmetkerleriniń kúni» bolyp bekitilgen.
