Keler jyly UBT tapsyrý formaty sol kúiinde qalady, degenmen birqatar qosymsha ózgerister bar, dep habarlaidy QazAqparat tilshisi.
Búginde Bilim jáne ǵylym ministrligi tarapynan 2019 jyly UBT-ny uiymdastyrý men ótkizý boiynsha daiyndyq jumystary júrgizilýde.
2019 jyldan bastap joǵary oqý ornyna aqyly negizde túsý úshin UBT jylyna 4 ret (qańtar, naýryz, maýsym-shilde, tamyz) ótkiziledi jáne alǵashqysy qańtardaǵy UBT-ǵa qatysý úshin ótinim 2018 jylǵy 1-15 jeltoqsan aralyǵynda qabyldanady.
UBT-ny sátti tapsyrǵan 11 (12) synyp oqýshylary JOO-ǵa aqyly negizde túse alady.
Sondai-aq, shet tilin tereń meńgergendigin rastaityn halyqaralyq sertifikattary bar oqýshylar «Shet tili» páni boiynsha UBT-dan bosatý normasy engizilýde.
«Aita ketý kerek, qańtar, naýryz jáne tamyz ailarynda UBT tapsyrǵan talapkerler bilim berý granttaryna úmitker bola almaidy, ol JOO-na aqyly túrde túsý múmkindigine ie bolýy úshin qarastyrylǵan, al grantqa talasý úshin maýsym-shilde ailarynda ótetin UBT-ǵa qatysýy qajet. Jáne de qańtar, naýryz ailarynda UBT tapsyrǵan oqýshylar maýsym-shilde ailaryndaǵy negizgi UBT-ǵa qatysa alady», - dedi QR Bilim jáne ǵylym vitse-ministri Ashat Aimaǵambetov OKQ-de ótken baspasóz máslihatynda.
Onyń aitýynsha, 2019 jyldyń qańtar, naýryz, tamyz ailarynda UBT tapsyratyn talapkerler testti aqyly túrde tapsyrady jáne onyń ár tapsyrýy 2242 teńgeni quraidy.
Vitse-ministr atalǵan ózgeristerdiń ne úshin engiziletinin tómendegidei dáiektermen túsindirdi.
«Jalpy UBT-ny tapsyrý formatynda, pánder men suraqtar boiynsha ózgerister joq. Qalǵan ózgeristerge kelsek biz kópshiliktiń pikirimen sanasý men monitoring jasaý negizinde keldik. Sonymen birinshi sebep, kóp adamdar nege Resei jáne basqa da elderde qysta emtihan tapsyryp oqýǵa qabyldaidy, nege bizde ondai múmkindik joq deitinderge jaǵdai jasaý, ekinshi nege bizde JOO-na túsý múmkindigi bir ret qana qarastyrylǵan degen ótinish ielerine qosymsha múmkindik beriledi, úshinshi, JOO-na túsý múmkindigi nege UBT-men ǵana shekteledi degen jii suraq qoiylatyn. Bul máseleni BǴM óz baqylaýyna alyp eki jyldan beri mektepte jáne ýniversitette bólek tapsyrý múmkindigi qarastyrylǵan», - dedi ol.
Onyń sózine qaraǵanda, 2019 jyldan bastap bilim granttary bilim berý baǵdarlamalarynyń toptary boiynsha taǵaiyndalatyn bolady. JOO-ǵa qabyldaý kezinde talapkerge túsken mamandyǵy boiynsha naqty bilim berý baǵdarlamasyn tańdaý múmkindigi beriledi. Ol úshin ministrlik JOO-y júzege asyratyn bilim berý baǵdarlamalarynyń tizilimin qalyptastyrady.
Aǵymdaǵy jylǵydai, UBT sertifikatymen birge árbir bitirýshige bilim berý baǵdarlamalary toptarynyń tizimi, bólinetin granttar sany, sondai-aq, ótken jylǵy grant taǵaiyndaý konkýrsynyń nátijeleri kórsetilgen aqparattyq paraq beriledi. Bul aqparattyq paraq talapkerge bolashaq mamandyǵyn tańdaýda kómektesedi.
