QR Bilim jáne ǵylym ministrligi Qazyǵurt aýdanyndaǵy M.Áýezov atyndaǵy jalpy orta mekteptiń 8-synyp oqýshysy Mahatai Alihan Talǵatulynyń mezgilsiz qaitys bolýyna orai ata-anasy men týǵan-týystaryna kóńil aitty, dep habarlaidy "Ult aqparat".
«Túrkistan oblystyq bilim basqarmasynyń bergen málimeti boiynsha, 2019 jylǵy 5 qyrkúiek kúni Qazyǵurt aýdany M.Áýezov atyndaǵy jalpy orta mektebiniń 8 synyp oqýshysy Alihan Mahatai dene shynyqtyrý sabaǵynda jyljymaly fýtbol qaqpasymen oinap, nátijesinde qaqpa ústine qulap, aýyr jaraqat alǵan. Oqiǵa bolǵan jerge jedel járdem shaqyrtylyp, aýdandyq aýrýhanaǵa jetkizilgen. A.Mahatai jansaqtaý bóliminde ota jasaý ústinde saǵat 15.00-16.00 shamasynda qaitys bolǵan. Búgingi tańda aýdandyq prokýratýra jáne ishki ister bólimi tergeý sharalary júrgizip jatyr», - delingen ministrlik taratqan aqparatta.
Atalǵan qaiǵyly jaǵdai QR BǴM Balalardyń quqyqtaryn qorǵaý komitetiniń jeke baqylaýyna alynǵan.
Vedomstvo málimetinshe, mektep ákimshiligi oqýshylar men ata-analar qaýipsizdik nusqaýlyǵymen tanystyrylǵanyn málimdegen. Qazirgi tańda mektep ákimshiligine qatysty qyzmettik tekserý júrgizilip, muǵalimder, ata-analar, oqýshylar arasynda qaýipsizdik sharalaryn qoldaný jóninde túsindirme jumystary atqarylýda.
Aita ketsek, Mahatai Alihan Talǵatuly 2006 jyly týǵan. Otbasynda bes perzenttiń eń kishisi. Otbasy materialdyq jaǵdaiy orta. Aldaǵy ýaqytta atalǵan jazataiym oqiǵaǵa qatysty qosymsha aqparat beriletin bolady.
