Ál-Farabi atyndaǵy Qazaq ulttyq ýniversitetiniń mańynda 18 jastaǵy qyzǵa aǵash qulap ketti. Ol qazir aýyr jaǵdaida aýrýhanaǵa jetkizildi. Bul týraly kaz.tengrinews.kz tilshisine zardap shekken qyzdyń ápkesi habarlady.
"Biz QazUÝ-da birge oqimyz. Sabaq saǵat 16.00-de aiaqtaldy. Meniń ápkem Móldir Erjanova ýniversitetten shyǵyp, aialdama jaqqa qarai júrdi. Sonda onyń ústine aǵash qulap ketti. Kýágerler ápkemniń jaǵdaiyn kórip, jedel járdem shaqyrdy. Móldir Qalqamandaǵy 7-shi aýrýhanaǵa jetkizildi. Jaǵdaiy aýyr, ota jasatý kerek shyǵar. Biz ázirshe eshteńe bilmeimiz", - dedi Zere Jumaǵalieva. - Aǵash onyń basyna qulap ketti, biraq ápkem esin joǵaltqan joq. Ol osymen ekinshi táýlik uiyqtaǵan joq. Oǵan komaǵa túspes úshin uiyqtamaý kerek dep aitqan eken".
Týystarynyń aitýynsha, qyz geografiia fakýltetiniń ekinshi kýrsynda oqidy.
Klinikadaǵy dárigerler zardap shekken qyzdyń densaýlyǵy jaily aityp berdi. "Naýqastyń jaǵdaiy aýyr, ota jasaý máselesin talqylap jatyrmyz. Dárigerler onyń jaǵdaiyn baqylaidy. Qyz jabyq bassúiek mi zaqymyn alǵan, samai súiegi synǵan", - dep habarlady №7 aýrýhanadaǵy №2 neirohirýrgiia bóliminiń orynbasary Ildar Kurmanov.
Sondai-aq, Tengrinews.kz tilshisi Bostandyq aýdanynyń ákimdigine habarlasty. Alaida ákimdiktegiler bul oqiǵa jaily bilmeitinin jáne oqiǵa ornyna barǵannan keiin osyǵan qatysty túsinik beretinin aitty.
