Ál-Farabi atyndaǵy Qazaq ulttyq ýniversitetiniń Filologiia jáne álem tilderi fakýltetinde daý shyqty. Fakýltettiń 10 stýdentin «álimjettik jasady» degen aiyppen oqýdan shyǵaryp jibergen.
Ádiletsizdikke kúiingen stýdentter men ata-analary búgin QazUÝ aldynda jazyqsyz jazalanǵandaryn aityp jinaldy. Narazylyq bildirýge 200-ge tarta stýdent kelgen. Stýdentterdiń aitýynsha, oqý ornynyń basshylary «barlyǵyńdy sýretke túsirip alyp, oqýdan shyǵaramyz» dep taratyp jibergen.
Daý osydan 12 kún buryn bastalǵan. Stýdentterdiń aitýy boiynsha, 30-31 qańtar kúni túngi saǵat 1:00 shamasynda 1-2 kýrs stýdentteri jataqhananyń bir bólmesine kirip, shai ishedi. Stýdentterdiń bólmege kirgeni jáne shyqqany sol jerdegi beinebaqylaýǵa túsken. Sodan tańǵy saǵat 6-da jataqhanaǵa tekseris keledi. Oqýdan shyǵarylǵan 2-kýrstyń 10 balasyna "1-kýrstyń balalaryn oqtaýmen urdyńdar, qabyrǵalaryn syndyrdyńdar, denelerin kógerttińder, densaýlyqtaryna zaqym keltirip osy jaǵdaiǵa jetkizdińder" degen aiyp taǵady.
Alaida stýdentter bul aiyptaýlardy teriske shyǵaryp otyr. Aitýlarynsha, aralarynda mundai jaǵdai bolmaǵan. Tipti, eshbir dálel de keltirilmegen. Zaqym keltirilgeni týraly meditsinalyq tekseris anyqtamalaryn da kórsetpegen. Oqiǵa shielenise kelip, osy jaǵdaiǵa jetken. Oqýdan shyǵarylǵan 10 stýdentti «toptyq qylmyskerler» dep aiyptap otyr.
«1-kýrstardy GBR-diń adamdary týaletke kirgizip, sheshindirgen. Denesindegi qaldy kórip, myna jerin kógertti degen. Ol bul kógergen emes, anama habarlassańyz bolady, kishkentaiymnan bar degen. Jábir kórdi degen balalardyń barlyǵyn ustap, qorqytyp otyr. Ádiletsizdikpen jala jaýyp otyr», - deidi oqýdan shyǵarylǵan stýdenttiń biri Ertai Bilalov.
Álimjettik jasady degen aiyppen oqýdan shyǵarylǵan balalardyń barlyǵy ýniversitettiń qoǵamdyq ómirine belsene aralasatyndar eken. Barlyǵy da grantta oqidy, stipendiia alady.
«Dekanat bizge osy isti bir bala moinyna alsa, qalǵandary oqýda qalady dep aitty. Sodan aramyzdaǵy bir jigitti qyspaqqa alǵandyqtan, ol barlyǵyn óz moinyna aldy. Endi taǵy 2-3 bala moiyndańdar dep jatyr», - deidi Talǵat Turdáli jáne Nurmuhan Jumabai.
Aitýlarynsha, jataqhanadan shyǵarǵan kúnniń ertesine oryndaryna adam alyp qoiǵan.
«Osyǵan deiin qanshama túsinikteme jazdyq. Jábirlenýshi taraptan túsinikteme bar ma desek, ol jaǵy qupiia deidi. Bizge eshteńeni túsindirip aitpaidy. Barlyq dálelder bar, tek anonimno deidi. Osydan bir ai buryn basqa fakýltette de osyndai oqiǵa bolǵan. Jataqhanada 23 bala tóbelesken. Olardyń tóbeles kezindegi videolary da, jazǵan habarlamalary da bar. Biraq olardy oqýdan shyǵarmaǵan. Tek jataqhanadan shyǵaryp, tiisti jaza qoldaǵan. Zań nege bárine birdei emes? Ózim grantta oqimyn, stipendiia alamyn. Sessiialardyń birinen de qulaǵan emespin. Osy jerge ádebiettiń ortasyna keldik. Stýdenttik teatrda da oinaimyn. Jaraidy, jataqhanadan shyǵarsyn. Oǵan tolyǵymen kelisemin. Ishki tártip boiynsha jataqhana ishinde júrmeýimiz kerek. Erejeni buzdyq. Biraq, oqýdan shyǵarý degenin túsinbeimin», - deidi Ertai Bilalov.
«Stýdentterdiń qaýipsizdigin qamtamasyz etetin mamandarǵa bardym. Olarǵa jábirlenýshi balalardyń jazǵan aryzyn kórsetińiz dedim. Kórsetti. Bizdi 10 bala urdy, solarǵa shara qoldansańyzdar dep jazyp qoiǵan. Biraq eshbir adamnyń aty-jóni kórsetilmegen. Ondai qaǵazdy kez kelgen adam jazady. Nege naqty adam kórsetilmeidi? Nege barlyǵyn osy jerge shaqyryp, bettestirmeidi? Biz sonyń shyndyǵyna jete almai jatyrmyz. Nakty faktini kórgimiz keledi», - deidi oqýdan shyǵarylǵan stýdentterdiń biriniń ákesi Aqberen Ábibýlla.
«Biz barlyǵymyz birge júremiz. 1-kýrstarmen týǵan kúnderimizdi birge atap ótemiz, sabaqtarymyzǵa kómektesemiz», - deidi stýdentter.
Ata-analar dekan Ómirhan Ábdimanulynyń ózine de kirgen. Alaida stýdentterdi oqýdan shyǵaramyz, barlyq dálelder bar dep shyǵaryp salǵan.
Fakýltettiń ózge de kýrs stýdentteri «10 balany oqýda qaldyrýyńyzdy suraimyz» dep ótinish te jazyp qaldyrǵan. Tipti jábirlenýshilerdiń ózderi dekanǵa balalardy oqýdan shyǵarmańyz dep ótinish jazǵan.
Ata-analardyń aitýynsha, muǵalimderiniń ózi de balalarǵa arasha túse almaǵan. Ashynǵan ata-analar rektorattyń da esigin qaǵypty, biraq olardy ishke kirgizbegen.
Osy jaǵdaiǵa qatysty filologiia jáne álem tilderi fakýltetiniń dekany Ómirhan Ábdimanulyna qońyraý shaldyq.
«Qazir ol týraly áńgimelesip otyratyn ýaqytym joq. Kelip surasańyzdar, barlyǵyn aityp bere alamyn. Osyǵan deiin jýrnalisterdiń barlyǵyna aittym. Sebep-saldarynyń barlyǵyn túsindirdim. Qabyrǵasy syndy, zaqym aldy dep aityp júrgen ata-analardyń ózderi. Onyń barlyǵyn jan-jaqty tekserip jatyrmyz», - dep jaýap berdi.
Qazirgi tańda oqiǵaǵa qatysty naqty bir dálelder keltirilmegen. Túsiniksiz tustary da barshylyq. Ata-analardyń boljamy boiynsha, grant oryndary bireýge kerek bolǵan syńaily. Óitkeni jataqhana oqýdan shyǵarylǵan on balanyń ornynan basqa stýdentterdi birden qonystandyrǵan. Biraq bul - ata-analardyń jeke pikiri.
Marjan Sábet, nege.kz
