«Qazposhta» AQ jyl saiyn 9 mlrd teńge shyǵynǵa tap bolýda. Bul týraly atalǵan kompaniianyń personal jáne ózgeristerdi basqarý jónindegi basqarýshy direktory Aqmaral Naizabekova málim etti, dep habarlaidy QazAqparat.
«Jyl saiyn álemde elektrondyq kommertsiia naryǵy damýda. Osy naryqta biz de aitarlyqtai jaqsy ósip kelemiz. Alaida kompaniiaǵa shyǵyn keltirip turǵan birqatar qyzmetter de bar. «Qazposhta» quramyndaǵy 3,3 myń bólimsheniń arasynda 2,7 myńy tiimsiz. Bul turǵyda bizdiń jeliler jyl saiyn shamamen 9 mlrd teńge shyǵyn keltiredi», - dedi A. Naizabekova Parlament Senaty Ekonomikalyq saiasat, innovatsiialyq damý jáne kásipkerlik komitetiniń keńeitilgen otyrysynda.
Osy oraida, ol qai baǵyttar kompaniia úshin shyǵyn keltirip turǵanyn naqtylady.
«Bul óz kezeginde infraqurylymǵa, kólikterge, jetkizý ýchaskelerine baǵyttalǵan shyǵyndar men qyzmetkerlerdiń eńbekaqysyn qamtyp tur. Iaǵni, biz áleýmettik mańyzy bar qyzmetti oryndaýdamyz, sáikesinshe, eldi mekenderdegi bólimshelerdi jaba almaimyz. Tek ótken jyly memleketten 4 mlrd teńgeden astam somaǵa sýbsidiia aldyq. Degenmen onyń kólemi barlyq shyǵyn somasyn jappaidy», - dedi ol.
Onyń sózine qaraǵanda, qalalardaǵy tiimdi basqa qyzmetter esebinen atalǵan shyǵyndar jabylyp keledi.
«Elektrondyq kommertsiiany damytý men biznesti tartý esebinen infraqurylymǵa jumsalatyn shyǵyndardy jabý kózdelip otyr. Jalpy, kompaniia tabys deńgeiin saqtap tur. Jylyna kompaniia shamamen 200-300 mln teńge kólemindegi tabys alýda», - dedi A. Naizabekova.
Aita keteiik, búgin Parlament Senaty Ekonomikalyq saiasat, innovatsiialyq damý jáne kásipkerlik komitetiniń keńeitilgen otyrysynda «Dúniejúzilik poshta odaǵynyń Jarǵysyna Toǵyzynshy qosymsha hattamany ratifikatsiialaý týraly» zań jobasy qaraldy.
