Áleýmettik jelilerde Soltústik Qazaqstan oblysy Aqqaiyń aýdany aýyldyq okrýgi ákimi Maira Jákimsalovanyń suhbatynyń úzindisi taralyp jatyr, - dep habarlaidy Massaget.kz saity TengriMIX portalyna silteme jasap.
Jelide jariialanǵan video úzindide ákim men jýrnalist 500 gektar jer jetpeitini týraly máseleni talqylap jatqany kórinedi.
"Bul qalai anyqtaldy?" - dep suraǵan jýrnalist.
"Halyq júgindi... Bul qalai anyqtaldy? Bul qalai anyqtalǵanyn qaidan bileiin?" - dep jaýap bergen ákim.
"500 gektar jer jetpedi dep tursyz ǵoi", - dep jalǵastyrady jýrnalist.
"Suraq qoima, men jaýap beremin, boldy. Kelistik pe? Birinshi ret suhbat berip turmyn", - dep jaýap bergen ákim.
Áleýmettik jeli qoldanýshylary arasynda pikir ekige bólingen: keibireýler ákimniń "shynaiylyǵy" men emotsiiasyn ázilmen qabyldasa, endi bireýler okrýg basshysy suhbat bere alýy ári tilshilermen sóileskende emotsiiaǵa jol bermeýi keregin jetkizgen.
Maira Jákimsalova videony bloger, oqýshysy ári áriptesi Timýr Jumanov jariialaǵanyn aitty.
"Ol kelip, eskertpei jumys barysyn túsirdi, montajyn jasady, jariialady, piar jasaýdy uiǵardy. Bul suraqqa shynynda da daiyn emes edim. Ol durys istemedi. Biraq men úshin bul sabaq boldy", - dep túsindirdi ol.
Okrýg basshysy bul jaǵdaiǵa bailanysty qatty alańdaitynyn moiyndady.
"Eki kún jyladym. Óz halqyma adal qyzmet etemin, keide densaýlyǵyma da qaramaimyn. Ony jumysym kórsetedi. Facebook-te de turǵyndar meniń jaǵymda. Alaida áleýmettik jelilerde "laýazymdy satyp alǵanymdy", "bireýdiń qyzy" dep jazatyndar bar. Biraq men qarapaiym otbasynan shyqqanmyn. Suhbat úzindisine keletin bolsaq, jaiylym jer qatynastary bóliminiń quzyretine jatady. Qalai bolǵanda da, ózimdi aqtamaimyn", - dep qorytyndylady Jákimsalova.
