Elordada «Tsifrlandyrý arqyly transformatsiia: Ýniversietter jáne sapany qamtamasyz etý» atty ekinshi Eýraziialyq forým ótip jatyr, dep habarlaidy QazAqparat.
Shara aiasynda BAQ ókilderine suhbat bergen BTS Digital bilim berý jobalarynyń jetekshisi Saiasat Nurbektiń aitýynsha, qazirgi ýaqytta bilim salasyndaǵy dúniejúzindegi eń úlken másele bul sońǵy 200-300 jylda qalyptasqan bilim berý modeliniń búgingi problemalardy sheshe almaýy bolyp otyr.
«Bir ǵana mysal keltireiin. Biz sertifikattaý, attestattaý modeline sáikes adamdy resmi baǵalaimyz. Biraq onyń 5 synyptyń 3 toqsanynda biologiiadan alǵan «5 degen baǵasy ómirine eshqandai qatysy joq. Ulttyq biryńǵai testileýdiń bally da onyń ómirindegi sheshýshi faktor bolyp qalyptaspaidy. Onyń ómirde tabysty bolýyna eshqandai qatysy da, bailanysy da joq. Iaǵni, biz qansha aqsha jumsap, infraqurylymdy jaqsartsaq ta adamnyń ómirde tabysty bolýyna, aiaqtan turýyna, turaqty damýyna bizdiń 20 jylymyz tikelei qatysty emes. Sondyqtan bilim berýde jańa model bolýy negizgi másele bolyp tur», - dedi ol.
Saiasat Nurbektiń aitýynsha, qazir álemde bul baǵytta úlken izdenis júrip jatyr. Aitalyq, 2015 jyldan bastap eń damyǵan elder «Bilim-2030» jobasyn bastady. Atalǵan jobanyń aiasynda 5 iri memleket ózderiniń bilim modeline eksperiment jasaý ústinde. Iaǵni, aldaǵy 5, 10 jylda búgingi qalyptasqan bilim modelin múldem túbegeili basqa modelge kóshirý máselesi qozǵalýda.
«Sondyqtan bizde bul máseleni talqylaýymyz kerek. Jalpy barlyǵy kadrlyq saiasatqa bailanysty. Qansha ministr aýysyp jatyr. Ár ministrdiń óz kózqarasy bar. Al bilim salasy, onyń tabiǵaty baiaý qozǵalady. Nátijelerin tez arada kóre almaityn sala. Bir nárseni ózgertseńiz, onyń nátijesin 15-20 jyldan keiin ǵana kóresiz. Al biz onyń nátijesin ólshemei, kórmei 5 jyldyń ishinde birneshe reforma bastap ketemiz», - dedi S.Nurbek.
