Aral-Syrdariia basseininiń memleketteri tarapynan Syrdariia ózeniniń tómengi aǵysyna sý jiberý boiynsha qabyldaǵan halyqaralyq sharttar men mindettemeler oryndalmaidy. Bul máseleni tez arada sheshý úshin Premer-Ministr Álihan Smailovtyń atyna joldaǵan saýalynda senator Murat Baqtiiaruly tiisti usynystardy aitty, dep habarlaidy QazAqparat.
Depýtattyń aqparaty boiynsha, Syrdariia ózeni basseininiń kepildi sýmen qamtamasyz etilýiniń buzylýyna bailanysty sońǵy jyldary Qyzylorda oblysynda sý tapshylyǵynyń óte kúrdeli problemasy qalyptasty. Ótken jyly Shardara sý qoimasyna kelisilgen sý kóleminiń 57% - y ǵana kelip tústi. Biyl jaǵdai odan da kúrdeli bolatyny qazir túsinikti.
«Mysaly, qazirgi kezde Kishi Araldyń sý kólemi 2015 jylǵa qaraǵanda bes millliard kýbqa azaiyp, jaǵalaýdan 20 metrge deiin tartylyp ketti. Oblys kólemindegi 200-den astam kóldiń 14–i tolyǵymen tartylyp, qalǵandarynyń sýy 50 paiyzǵa deiin azaidy», - dep atap ótti depýtat.
Murat Baqtiiaruly oblys halqynyń negizgi bóligi Syrdariia ózeninde turatynyn jáne olardyń tabystary ózen ekojúiesimen tikelei bailanysty ekenin atap ótti. Osyǵan bailanysty, oblys turǵyndary qalyptasqan jaǵdaidyń nasharlaýyna qatty alańdaidy, sondyqtan senator memleketaralyq deńgeide sý jetkizý máselesin jedel sheshýdi óte mańyzdy dep sanaidy.
«Úkimet basshysy retinde sý saiasatyn myqtap qolǵa almasańyz, erteń kesh bolady. Tiisti ministrlik deńgeiinde bul másele sheshilmeidi. Ol úshin transshekaralyq sý máselelerinde Qazaqstannyń múddesin bermeýimiz kerek. Sondyqtan sý saǵasynda ornalasqan elderden sýdyń memleketaralyq kelisimge sáikes mólsherin memlekettik deńgeide sheshýdiń joldaryn tez arada qarastyrý qajet. Ortaq sý paidalaný máselesin tiimdi sheshý úshin ol elderge qatysty ekonomikalyq tetikterdi de paidalanǵan durys dep esepteimiz», - dedi senator.
Sondai-aq, Murat Baqtiiaruly óńirdegi paidaly qazbalardy óndirý deńgeiin tómendetýge, gazben qamtamasyz etýge jáne basqa da máselege bailanysty negizgi problemalardy atap ótti.
