QR ekologiia, geologiia jáne tabiǵi resýrstar ministri Maǵzum Myrzaǵaliev Qazaqstandaǵy kiik sanyn aitty, dep habarlaidy "Ult aqparat".
«Tabiǵat zańy eshqashan óz dəstúrinen jańylǵan emes. Dəl osy kezeń kiik tóldep, quralaiyn órgizetin sət. Mamyrdyń basynda bastalyp, birneshe aptaǵa sozylatyn qazaq aitatyn «quralaidyń salqyny» kelip jetti. Ótken jyly saiyn dalamyzda 335 myń kiik esepke alyndy. Ókinishke qarai, biyl kiik sanyn əýeden kóktemgi sanaý tótenshe jaǵdai rejimine bailanysty keiinge shegerildi. Bul jumys kúzde jalǵasady», - dep jazady Maǵzum Myrzaǵaliev Twitter paraqshasynda.
Onyń aitýynsha, qazir inspektorlar kiik tólin órgizetin jerlerdi airyqsha qorǵaýǵa kirisken.
«Kúsh qurylymdarmen birge brakonerlikti boldyrmaý maqsatyndaǵy «Kiik» keń aýqymdy aktsiiasy iske asyrylýda. Mamandar da aqbókenderdiń hal-ahýalyn jiti qadaǵalap otyr. Tabiǵat óz perzentine meiirimin tógip, mań daladaǵy kiik sany kóbeie túsedi dep úmittenemin», - deidi ministr.
