Foto: QR MAM
QR Mádeniet jáne aqparat ministrligi men Ulttyq kinony qoldaý memlekettik ortalyǵynyń qoldaýymen túsirilgen «Qajymuqan» filmi Italiiada ótken XXIX Halyqaralyq IPAAF – Apoxiomeno kinofestivalinde biikten kórindi, dep habarlaidy Ult.kz.
Kartinan festivaldiń basty marapattaryn jeńip aldy. Atap aitsaq, «Úzdik film», «Eń úzdik er adam róli» (Erbol Tólepbergen), «Úzdik rejissýra» (Qanaǵat Mustafin) jáne «Úzdik stsenarii» (Qanaǵat Mustafin, Janat Qasabekov) nominatsiiasyn ielendi.
Film rejisseri Qanaǵat Mustafin tarihi film stsenariiine 2012 jyly kirisken. 2020 jyly túsirilimin bastap, on jyldan astam ýaqyt zertteý júrgizgen. Sonyń nátijesinde týyndy ótken jyly úlken ekranǵa usynylyp, prokatqa shyqty.
Qajymuqan Muńaitpasov – frantsýz kúresinen álem chempiony atanǵan tuńǵysh qazaq. Ol álemdik, óńirlik, reseilik, keiin Búkilodaqtyq sýper aýyr salmaqtaǵy klassikalyq kúres chempionattarynyń birneshe dúrkin jeńimpazy atanǵan. Balýan óziniń sporttyq mansabynda elýge jýyq medal men marapatqa ie bolyp, ult maqtanyshyna ainaldy.
Aita keteiik, IPAAF-Apoxiomeno festivali 30 jylǵa jýyq uiymdastyrylyp keledi. Italiiada ótetin bedeldi halyqaralyq kinofestival jyl saiyn kino, óner jáne mádeniet salasyndaǵy úzdik týyndylardy marapattaidy. Festival ásirese áleýmettik mańyzy bar taqyryptardy qozǵaityn, kórkemdik deńgeii joǵary jáne mádeni damýǵa yqpal etetin shyǵarmalarǵa basa nazar aýdarady. Ár jyldary bul festivalde álemniń túkpir-túkpirinen kelgen kórnekti óner qairatkerleri jeńimpaz atanǵan.
