Qajylyqta júrgen qazaqstandyqtar arasynda zardap shekken adam joq. Bul týraly QazAqparat QR Syrtqy ister ministrligine silteme jasap habarlaidy.
Sheteldik basylymdardyń jazýynsha, biylǵy qajylyqqa álemniń 167 elinen 1,8 mln adam barǵan. Solardyń arasynda Qazaqstannan barǵan 3 200 otandasymyz da bar.
QR Syrtqy ister ministriliginiń aqparatyna qaraǵanda, ázirge qazaqstandyqtar arasynda qajylyq kezinde zardap shekken adam joq.
«Qajylyq kezinde zardap shekken Qazaqstan Respýblikasynyń azamattary týraly eshqandai habar túsken joq», - deidi ministrliktiń resmi ókili Aibek Smadiiarov.
Buǵan deiin Azertadj agenttigi Saýd Arabiiasynda qajylyq maýsymy kezinde 190 myń adamǵa meditsinalyq qyzmet kórsetilgenin habarlaǵan bolatyn.
Mádinada musylman kúntizbesi boiynsha zulqada aiynyń alǵashqy kúninen zulhijja aiynyń ekinshi kúnine deiingi aralyqta 190 719 adam dáriger kómegine júgingen. Sonyń ishinde 297 adamnyń júregine ota jasalǵan. Budan bólek, 921 dializ protsedýrasy, 44 laporoskopiia otasy, 293 hirýrgiialyq ota qoldanylǵan.
«New York Times» biylǵy qajylyq Saýd Arabiiasy men Iran arasyndaǵy saiasi ári dinaralyq salqyndyq báseńsimei turǵan shaqqa, búkil arab álemi Iemen, Siriia jáne Liviia elderindegi jaǵdaiǵa alańdap otyrǵan kezeńge dóp kelgenin jazdy. Úndistannyń Kashmirinde, Mianma men Qytaida da islam dinin ustanýshylarǵa qysym artyp turǵanyn eske salǵan basylym qajylyq úshin AQSh azamattaryna 20 myń kvtoa bólingen baiandaǵan.
«Saýd koroli Salman Jańa Zelandiianyń Kraistcherch qalasynda eki birdei meshitke jasalǵan shabýylda qaza bolǵan 51 musylmannyń 200 týysqanyn qajylyq qonaǵy retinde shaqyrdy» , - delingen maqalada.
Biyl qajylyqqa kvota alǵan elderdiń arasynda Kongo joq. Sheteldik BAQ-tyń jazýynsha, Saýd Arabiiasy atalmysh elde ebola dertiniń órship turýyna bailanysty, kvota berýden bas tartqan.
Mekkegge attanǵan otandastarymyz ózge de musylmandarmen birge 10-13 tamyz aralyǵynda qulshylyq rásimderine qatysady. Olardyń qaýipsizdigine ondaǵan myń qaýipsizdik qyzmetiniń mamandary, 17 myń azamattyq qorǵanys salasynyń ókili tartylǵan.
Ázirge 2019 jylǵy qajylyq týraly tómendegi sandar ǵana beligili. Saýdiialyq BAQ málimeti boiynsha, qajylyq óteýshiler sany 2,5 mln adamǵa jaqyndaǵan.
El biliginiń resmi deregi boiynsha, qajylyq sapar úshin álemniń ár túkpirinen 3000 áýe reisi qatynaǵan. Qurbandyq úshin qulshylyq etýshilerge 1 mln-nan astam mal bólingen.
