Biyl qajylyq saparǵa elimizden 3200 adam barmaq, dep habarlaidy QazAqparat.
QR Aqparat jáne qoǵamdyq damý ministrligine qarasty Din isteri komitetiniń tóraǵasy Erjan Núkejanovtyń aitýynsha, biyl qajylyq saparǵa elimizden 3200 adam barmaq.
«Qajylyq saparǵa arnaiy missiia quryldy. Oǵan din isteri komiteti men Qazaqstan musylmandary Dini basqarmasynyń ókilderi, densaýlyq saqtaý ministrliginiń ókilderi kirip otyr. Qajylyq kezinde uiymdastyrý jaǵynan, densaýlyq máselesi boiynsha qiyndyqtar týyndap jatsa, missiia ókilderi kómektesetin bolady. Búginge deiin qajylyqqa niet bildirgen musylmandar úshin arnaiy seminarlar uiymdastyrdyq. Bul sapardyń qansha paryzy, ýájipteri men súnneteri bar ekeni eldegi 500-den astam meshitte túsindirildi. Arnaiy seminarlardan ótken musylmandar Saýd Arabiiasy elinde sol úirengenderi boiynsha qulshylyq etetin bolady», - deidi Erjan Núkejanov Ortalyq kommýnikatsiialar qyzmetinde ótken jiynda.
Komitet ókiliniń aitýynsha, biylǵy qajylyq maýsymy shildeniń 30-ynan bastalady.
«30 shilde kúni qajylyqqa niettengen azamattar Shymkent jáne Aqtaý qalalarynan Saýd Arabiiasyna sapar shegedi. Saýd Arabiiasy tarapynan bizdiń azamattarǵa 3200 kvota bólingen bolatyn. Bul iske eki áýe kompaniiasy tartylyp otyr. Onyń biri Saýd Arabiiasynan Flynas kompaniiasy bolsa, Qazaqstan tarapynan SCAT kompaniiasy. Olardyń árqaisysy 1600 adamnan tasymaldaidy», - dedi Din isteri komitetiniń ókili.
Qazaqstan musylmandary Dini basqarmasy tóraǵasynyń birinshi orynbasary, naib múfti Naýryzbai Ótpenov qajylyqqa niettenýshiler arasynda Túrkistan oblysynyń turǵyndary kóp ekenin aitady.
«Halyqtyń tyǵyz ornalasýy men meshit sanynyń kóp bolýyna bailanysty Túrkistan oblysynan qajylyqqa barýǵa niet bildirýshiler sany joǵary. Bul óńirde 800-den astam meshit bar. Jas erekshelikterine keletin bolsaq, qajylyq mindeti balaǵat jasyna (kámelet jasy) tolǵan azamattarǵa paryz bolyp sanalady. Biylǵy baratyn azamattardyń orta jasy 30-50 jas aralyǵyn qamtidy. Árine baramyn deýshilerdiń arasynda úlken kisiler óte kóp. Biz olarǵa aldymen densaýlyq jaǵdaiyn oilaýǵa keńes beremiz. Sebebi qajylyq jai ǵana baryp keletin sapar emes», - dedi ol.
Eske salsaq, jyl basynda qazaqstandyqtardy qajylyqqa aparatyn eki áýe kompaniiasy bekitilgen bolatyn.
