«Qazgidromet» RMK uzaq merzimdi aýa raiy boljamyn jariialady, dep habarlaidy "Ult aqparat".
«Jazdyń alǵashqy eki aiy salqyn bolady, jańbyr kóp jaýady degen boljam bar. Tek batys pen ońtústik óńirlerde ǵana jańbyr normadan az jaýady. Tamyz aiyna keletin bolsaq, elimizdiń batysynda ystyq kún raiy kútilýde. Aýanyń ortasha ailyq temperatýrasy klimattyq normadan bir-eki gradýs joǵary bolady jáne jańbyr az jaýady degen boljam bar», - dedi «Qazgidromet» RMK uzaq merzimdi aýa raiy boljamy basqarmasynyń basshysy Gúlmira Aqysheva Astanada ótken baspasóz máslixatynda.
Onyń aitýynsha, uzaq merzimdi boljamdar áli de ózgerýi múmkin. Sebebi eki-úsh aidan keiingi aýa temperatýrasyn dóp basyp aitý qiyn.
«Aýa raiynyń uzaq merzimdi boljamyn ázirlegende biz mindetti túrde statistika ádisin qoldanamyz. Sonymen qatar, Dúniejúzilik meteouiymynyń quramyna kiretin, ozyq texnologiialarmen, esepteýish sýper kompiýterlermen jabdyqtalǵan álemniń 13 jetekshi meteo ortalyqtardyń jasaityn jahandyq-maýsymdyq boljamdaryna súienemiz. Biraq aýa raiy boljamynyń uzaqtyǵy neǵurlym ulǵaiǵan saiyn soǵurlym aǵattyq ta ketip jatady. Ol atmosferanyń retsiz tabiǵatyna bailanysty. Alaida, aýa aǵyndary únemi qozǵalysta bolǵandyqtan sońǵy kórteskishterge áser etetin kóptegen faktorlar bar. Sondyqtan berilip otyrǵan maýsymdyq boljamdarymyzdy konsýltativtik boljam retinde paidalanǵandaryńyz abzal. Bunyń barlyǵy ailyq, onkúndik jáne qysqa merzimdi boljamdarmen naqtylanady», - dep atap kórsetti G.Aqysheva.
Aita keteiik, búgingi baspasóz máslixatynda sáýir aiyndaǵy aýa raiynyń boljamy da jasaldy. Kelesi aida aiaz bolady.
