Básekelestikti qorǵaý jáne damytý agenttiginiń tóraǵasy Serik Jumanǵarin «QazAvtojol» kompaniiasy jariialaǵan konkýrs boiynsha ótip jatqan sot isi týraly málimet berdi, dep habarlaidy QazAqparat.
Serik Jumanǵarin «QazAqparat» halyqaralyq aqparat agenttiginiń alańynda ótken Orep Space kezdesýde memlekettik satyp alý konkýrstarynda da baǵany kelisip belgileý beleń alyp turǵanyn aitty.
«Baǵany kelisip belgileý boiynsha aitsaq, 2020 jyldyń qorytyndysy áli jasalyp jatyr. Pandemiia óz áserin tigizdi. Biraq qazirdiń ózinde 1,7 mlrd teńgeniń aiyppuly salyndy. 2018-2020 jyldary saýda alańdarynda 55 baǵa kelisimi anyqtalǵan», - degen agenttik basshysy «QazAvtoJol» kompaniiasynyń daýly konkýrsy týraly málimet berdi.
«Mysaly, avtomobil joldaryn salý naryǵy jergilikti ákimdik pen «QazAvtoJol» kompaniiasynyń quzyryna kiredi. Qazir bizde sot protsesteri júrip jatyr. Eki kompaniia 7,2 mlrd teńgeniń konkýrsyna qatysqan. Jeńimpaz kompaniia konkýrsta utý úshin satyp alý baǵasyn 4 000 paiyzǵa arzandatqan. Eki kompaniia da araǵa 14 minýt salyp bir mezette ótinim bergen, ekeýi bir IR-mekenjaidy qoldanǵan. Iaǵni eki ótinim de bir kompiýterden joldanǵan. Kompaniialar tipti bir zańdy mekenjaida ornalasqan. Bir qurylys konsortsiýmyna qaraidy. Zattardy bir ǵana oryndaý daiyndaǵan, kórsetilgen bailanys nómirleri de ortaq», - dedi Serik Jumanǵarin.
Eske salsaq, Básekelestikti qorǵaý jáne damytý agenttigi 2025 jylǵa deiin eldegi biryńǵai operatorlardyń teń jartysyn qysqartpaqshy.
«Onyń ishinde 11 kásiporyn boiynsha túbegeili shara qabyldadyq. Ekeýiniń jumysyn ońtailandyramyz da, 9-yn «operator» mártebesinen aiyramyz. Bul 9-dyń beseýi jeke menshikke berilse, qalǵan tórteýi «operator» mártebesinsiz memlekettik organǵa baǵynyshyty kásiporyn bolyp qalady. Olardyń da satyp alýlar kezinde eshqandai basymdyqtary bolmaidy. Bul usynystardy ázirge Prezident ákimshiligi qoldap otyr. Jalpy 2025 jyldyń aiaǵyna deiin 20-25 operatordy mártebesinen aiyrý josparlanyp otyr. Bul alańdy tazartsaq, shaǵyn jáne orta biznes ókilderi úshin 47 mlrd teńgeniń qyzmet kórsetý jáne taýar naryǵyna jol ashylady», - dedi agenttik tóraǵasy.
