Búgin «Samuryq-Qazyna» qorynyń Qoǵamdyq keńesinde «Qazatomónerkásip» UAK» AQ-nyń 2025 jyldyń alǵashqy alty aiyndaǵy jumysy talqylanyp, kompaniianyń áleýmettik jáne strategiialyq baǵyttary boiynsha mańyzdy aqparattar jariialandy. Basqarma tóraǵasy Meiirjan Iýsýpov óz baiandamasynda álemde atom energetikasyna degen suranystyń turaqty ósýi jaǵdaiynda kompaniianyń damýy men negizgi basymdyqtaryn atap ótti, dep habarlaidy Ult.kz Tizgin.kz-ke silteme jasap.
Esep barysynda eń kóp nazar aýdarylǵan taqyryptardyń biri — Qazatomónerkásiptiń áleýmettik jaýapkershilik baǵytyndaǵy jumystary boldy. Sońǵy eki jyl ishinde kompaniia óz qyzmeti júrip jatqan óńirlerdiń áleýmettik ál-aýqatyn jaqsartýǵa aitarlyqtai úles qosqan. 2024 jyl jáne 2025 jyldyń toǵyz aiy ishinde áleýmettik jáne qaiyrymdylyq bastamalarǵa 4,5 mlrd teńgeden astam qarjy baǵyttalǵan.
Bul qarajat aýyldyq infraqurylymdy jaqsartýdan bastap, tótenshe jaǵdai kezinde jedel kómek kórsetýge deiingi kóptegen mańyzdy baǵyttarǵa jumsaldy. Máselen, Túrkistan men Qyzylorda oblystarynda áleýmettik nysandar salynyp, balalar men sport alańdary paidalanýǵa berildi. Kósheler abattandyrylyp, kógaldandyrý jumystary júrgizildi. Infraqurylymdy damytýǵa salynǵan investitsiia kólemi 700 mln teńgeden asyp otyr.
2024 jyldyń kókteminde Batys óńirin jailaǵan joiqyn sý tasqyny kezinde kompaniianyń shuǵyl áreketi erekshe atap ótildi. Qazatomónerkásip apat saldaryn joiý úshin 3 mlrd teńge kóleminde kómek berip, bul qarajat halyqqa tikelei qoldaý kórsetý men qiraǵan nysandardy qalpyna keltirýge baǵyttaldy.
Buǵan qosa, 2024-2025 jyldary qaiyrymdylyq jobalaryna 800 mln teńgeden astam qarjy bólingen. Bul qarajat az qamtylǵan jáne kópbalaly otbasylarǵa, múmkindigi shekteýli balalarǵa, zeinetkerler men ardagerlerge qoldaý kórsetýge jumsaldy. Azyq-túlik sebetteri, kómir, kiim-keshek, mektep quraldary taratylyp, balalardy emdeýge qarjylai kómek kórsetilgen. Sondai-aq mektepter interaktivti taqtalar, LED-ekrandar jáne bilim berý basylymdaryna jazylymdarmen qamtamasyz etildi.
Qoǵamdyq keńes otyrysy kompaniianyń tek óndiristik salada ǵana emes, áleýmettik jaýapkershilik baǵytynda da aýqymdy ári júieli jumys atqaryp kele jatqanyn kórsetti. Qazatomónerkásiptiń óńirlerdiń damýyna qosyp otyrǵan úlesi jyl saiyn artyp keledi, al bolashaqqa arnalǵan josparlar — elimizdiń áleýmettik-ekonomikalyq áleýetin nyǵaitýdy jalǵastyrýǵa baǵyttalǵan.
Qoǵamdyq keńestegi ashyq talqylaý kompaniia jumysynyń aiqyn, jaýapty jáne qoǵam múddesine baǵyttalǵandyǵyn taǵy bir márte dáleldedi.
