«Samuryq-Qazyna» UÁQ» AQ aktivterdi damytý jáne jekeshelendirý jónindegi teń basqarýshy direktor Erjan Tutqyshev «Qazatomónerkásip» UAK» AQ aktsiialaryn naryqqa shyǵarý boiynsha túsinik berdi, dep habarlaidy "Ult aqparat".
«Ózderińiz bilesizder, «Qazatomónerkásip» QR Úkimeti bekitken jekeshelendirý tizimine enip otyr. Osy oraida qundy qaǵazdardyń uiymdastyrylǵan naryǵynda 25 paiyzǵa deiingi aktsiialardy satýǵa ruqsat etilgen. 2018-2019 jyldary «Samuryq-Qazyna» qory 25 paiyzdyń ishindegi 18,8 paiyz aktsiiany sátti ornalastyrdy. Al qalǵan 6,28 paiyzy ornalastyrylmaǵan edi», - dep toqtaldy E. Tutuqyshev onlain rejimde ótken brifingte.
Onyń sózine qaraǵanda, sońǵy birneshe aida kúrdeli makroekonomikalyq jaǵdai qalyptasyp, bul óz kezeginde kóptegen kompaniialardyń jumysyna eleýli áser etti. Alaida, «Qazatomónerkásip» UAK» AQ bul belesti operatsiialyq ári qarjylyq turǵyda senimdi eńsergen.
«Sondyqtan kompaniianyń qarjylyq jáne tabys kórsetkishteri, aktsiia kodirovkalary aitarlyqtai jaqsy deńgeide boldy. Jahandyq naryqtardyń qalpyna kelýine qarai, «Samuryq-Qazyna» qory 6,28 qosymsha paketimen shyǵý múmkindigin pysyqtady. Osy paketti ótkizý úshin ótinimderdi jedeldetip jinaqtaý ádisi tańdaldy. Bul turǵyda birneshe saǵat ishinde investorlar pýlyn qalyptastyrý múmkin boldy, sondai-aq olar kórsetilgen dárejeden eki ese artyq usyndy», - dedi basqarýshy direktor.
Onyń aitýynsha, ótinimderdi jinaqtaý nátijesinde «Samuryq-Qazyna» 206 mln AQSh dollary somasyna aktsiia ornalastyrdy. Onyń quny jahandyq depozitarlyq qolhat úshin 13 dollar nemese bir aktsiia úshin 5 230 teńgege baǵalanyp otyr.
«Búgin saǵat 14:00-den bastap Qazaqstan azamattaryna, iaǵni jeke tulǵalarǵa arnalǵan jeke transh ashyldy. Turǵyndar osy aktsiialardy halyqaralyq ári qazaqstandyq zańdy tulǵalarǵa usynylǵan talaptar boiynsha alady. Qazaqstan azamattary úshin ótinimderdi jinaqtaý birneshe kúnge sozylady, iaǵni 8 maýsym kúni saǵat 16:00-de aiaqtalady. Jekeshelendirýden túsken barlyq qarjy Úkimet tapsyrmasyna sáikes, QR Ulttyq qoryna baǵyttalady», - dedi Tutqyshev.
Osylaisha, «Samuryq-Qazyna» qory aktsiialardyń 75 paiyzyna ielik etedi.
