Qazaqstandyq daryndy ánshi Erjan Maksimniń jańa beinebaiany tanystyryldy, dep habarlaidy "Ult aqparat".
«Men bul ándi elimizdiń Táýelsizdik kúnine arnaǵym keledi. Halqymyz tatý-tátti ári birlikte ómir súrgenin qalaimyn», - dedi ánshi.
Beinebaiandy Almatyda «Habar» agenttiginiń shyǵarmashylyq toby túsirgen. Ánge jaýyngerlik rýh, taisalmaityn minez, qajymas qairat arqaý bolǵan. Basty keiipker retinde Erjan Maksimniń ózi túsken. Sondai-aq klipten tanymal ánshilerden Búrkit pen Nurlan Abdýllindi, Jigitter tobyn, sportshylardan Olimpiada chempiony Ermahan Ibraimovti, kásipqoi boksshy Janqosh Turarovty kórýge bolady.
«Habar» telearnasynyń direktory Dinara Bisembina jastarǵa osylaisha qoldaý bildirý kerektigin aitady.
«Erjan Maksimdi qoldaýǵa bel býdyq. Án batyrlarǵa arnalǵan. Bul beinebaiandy Erjannyń qazaqstandyqtarǵa arnaǵan syiy deýge bolady», - deidi ol.
