Ǵylymi turǵyda qazaqtyń aqbas tuqymyn ary qarai damytý mindeti iske asyrylyp jatyr. Bul týraly QR AShM Mal sharýashylyǵy ónimderin óndirý jáne qaita óńdeý departamenti direktory Erkebulan Ahmetov málim etti, dep habarlaidy QazAqparat.
«Muhittyń arǵy jaǵyndaǵy elderden asyl tuqymdy iri qara mal importtaý qiynǵa túsetini belgili. Jalpy, bul sharalar kerek pe? Qazaqtyń aqbas siyryn ósirý bizge tiimdi bolady ǵoi, biz nege osy baǵytta ary qarai damytpaimyz? Bul iri qara túri bizdiń klimatqa beiimdelgen», - dep surady depýtat Maira Aisina Májiliste asyl tuqymdy mal sharýashylyǵy salasyna arnalǵan zań jobasynyń tanystyrylymda.
Óz kezeginde Erkebulan Ahmetov qazaqtyń aqbas tuqymyn ósirýdi damytý sharalary týraly aityp berdi.
«Zańnamaǵa engizilgen ózgeristerge sáikes, memleket tarapynan qazaqtyń aqbas iri qarasyn ósirýge bailanysty arnaiy sýbsidiialar engizilgen bolatyn. Bul sýbsidiianyń maqsaty – asyl tuqymdy jumystardy taza deńgeide júrgizý. Sonyń esebinen qazirgi ýaqytta qazaqtyń aqbas tuqymyn 530 myń basqa deiin jetkizip otyrmyz. Jalpy, jaqsy qarqyn bar. Iri qara maldyń arasynda asyl tuqymdy maldyń satylýy qurylymyn qaraityn bolsaq, 65 paiyzy qazaqtyń aqbas tuqymyna tiesili. Fermeler iri qaranyń osy tuqymyna joǵary qyzyǵýshylyq bildirýde», - dedi E. Ahmetov.
Onyń sózine qaraǵanda, búginde ǵylymi turǵyda qazaqtyń aqbas tuqymyn ary qarai damytý mindeti qoiylǵan. Bul rette 2018-2020 jyldarǵa ǵylymi jumys júrgizýge arnaiy tapsyrma berilgen. Ol boiynsha 200 mln teńgege jýyq qarajat bólindi.
Budan buryn habarlanǵandai, Parlament Májilisinde «Qazaqstan Respýblikasynyń keibir zańnamalyq aktilerine asyl tuqymdy mal sharýashylyǵy máseleleri boiynsha ózgerister men tolyqtyrýlar engizý týraly» zań jobasy tanystyryldy.
