«Əzerbaijan qaýymdastyǵy» respýblikalyq qoǵamdyq birlestigi Kókshetaý qalalyq filialynyń tóraǵasy Nazim Shihaliev qazaqstandyqtardy Naýryz meiramymen quttyqtady, dep habarlaidy QazAqparat.
Elimizdi meken etken oi-maqsaty ortaq san alýan ult pen ulys ókilderiniń biri – əzerbaijandar.
Əzerbaijandyqtardyń Qazaqstanǵa kelý tarihy da ərtúrli. Biri sonaý HH ǵasyrdyń basynda Qazaqstanǵa jer aýdarylsa, endi biri - Keńes odaǵy kezinde joldamamen kelgender.
Búgingi bizdiń keiipkerimiz de - Əzerbaijannyń Masaly aýdany Shatyroba aýylynyń týmasy 1970 jyldary KSRO Ishki ister ministrliginiń joldamasymen Qazaqstanǵa qonys aýdarǵan.
Qazirgi kezde onyń internatsionaldy otbasy osynda tamyryn tereńge jaiyp, nemere súiip, baqytty ómir súrip jatyr.
Ol Qazaqstandy óziniń ekinshi Otany sanaitynyn, qazaq halqy – óte meiirban, meimandos, kishipeiil ekenin aitady.
«Jalpy meniń qazaq halqyna degen qurmetim sheksiz. Sebebi, qazaq halqy óte meiirban halyq. Júregi jomart, kóńili darhan, keń halyq. Elimiz kórkeiip, gúldenip, bir shańyraqta júzdegen ult pen ulys bir úidiń balasyndai tatý-tətti ǵumyr keshýdemiz. Osynyń barlyǵy QR Tuńǵysh Prezidenti – Elbasy Nursultan Nazarbaevtyń syndarly saiasatynyń jemisi dep bilemin. Oblys ortalyǵynda qurylǵan «Əzirbaijan qaýymdastyǵy» respýblikalyq qoǵamdyq birlestiginiń ashylǵanyna minekei, biyl on úsh jyl tolady. Elimizde týǵan halqymyzdyń mədenieti men tóltýma ónerin saqtaýǵa keń óris bar. Ulttyq bi úiirmesi, til úiretý sabaqtarynda óskeleń urpaq», - dep qosty Nazim Shihaliev.
Osy rette ol qazaqtar men əzerbaijandardyń arasynda kóptegen uqsastyqtar baryn alǵa tartty. Naýryz - qos halyqqa ortaq ulyq meiram.
Əzerbaijan halqy ózderiniń tilimen aitqanda «novrýzdy» eń súiikti mereke sanaidy. Eski jyldyń sońǵy sərsenbisi, iaǵni, «ahyr chershenbe» kúninen bastap jańa jyl qamyna kirisedi.
Sol kúni úi men ydys-aiaǵyn tazalap, qaitys bolǵan týystaryna duǵa etedi.
Al, jańa jyl kirgen kúni erte turyp, ózenge nemese bulaq basyna baryp, shomylady. Iaǵni, jańa jyldyń birinshi kúnin taza nietpen, aq peiilmen qarsy alady.
Sondai-aq, bul kúni əzerbaijandyqtar orazasyn balmen nemese qantpen ashady. Aldaǵy ómirimiz bal men sheker syndy tətti bolsyn degen nietten.
«Merekeniń qýanyshymen-aq ótip ketetin jańa jyldyń alǵashqy kúnin ázirbaijan halqy da túrli as qoiylǵan aq dastarhanmen qarsy alady. As məzirinen «iedi-levin» taǵamy da qalyspaidy. Bul taǵamnyń bizdiń naýryz kójemizge uqsastyǵy bar. Oǵan da jeti túrli dəm qosylady. Jalpy, bizdiń dastarhan məzirimiz de uqsas. Ərdaiym kópshilikke aq dastarhan basyndaǵy adal asyn usynatyn qazaqtar tərizdi ázerbaijan halqynyń jomart dastarhany da ulttyq taǵamdardyń kóptiginen qaiysyp turady. Sóz sońynda barsha zamandastarymyzdy naqyshty Naýryz merekesimen quttyqtaimyn. «Novrýz bairamynyz mýbarek olsýn! Qazaqstan halgy hoshbaht olsýn!» degim keledi», - dep túiindedi «Əzerbaijan qaýymdastyǵy» respýblikalyq qoǵamdyq birlestigi Kókshetaý qalalyq filialynyń tóraǵasy Nazim Shihaliev.
