Elordada «Nur Otan» partiiasy men Nur-Sultan qalasy ákimdiginiń qoldaýymen jyrshy-termeshilerdiń «Jyr-amanat» kontsert-spektakli ótti, dep habarlaidy "Ult aqparat".
«Nur Otan» partiiasynyń baspasóz qyzmetinen málim etkendei, kesh barysynda ár óńirden jinalǵan jyrshylyq dástúrdiń ókilderi óner kórsetti. Atap aitqanda, «Jetisý», «Mańǵystaý», «Qarataý», «Arqa», «Atyraý-Jaiyq», «Syr eli», «Aqtóbe» jyrshylyq dástúrleriniń ónerpazdary qalyń kórermenniń ystyq yqylasyna bólendi.
Qazaqy jyr men dástúrli mýzykanyń ǵajaiyp keshin ashqan «Nur Otan» partiiasy Tóraǵasynyń birinshi orynbasary Baýyrjan Baibek jinalǵan jurtty aldymen Táýelsizdik merekesimen quttyqtady.
«Bul sharanyń osy merekege orailastyrylýynda zor mán bar. Óitkeni baǵzydan jetken bul jyrlarda ata-babamyzdyń armany men ańsary, azattyq, eldik ideialary, keler urpaqqa amanaty jatyr. Dástúrli ónerimiz san ǵasyrlar boiy urpaq tárbiesine qyzmet etken. Sondyqtan da Táýelsizdiktiń alǵashqy sátinen-aq Elbasy-«Nur Otan» partiiasynyń Tóraǵasy Nursultan Nazarbaev ultymyzdyń uly murasyn, ozyq dástúrleri men mádeni qazynasyn túgendeýge, olardy zamanǵa sai túletip, jańǵyrtýǵa erekshe den qoidy. Halyqtyń partiiasy retinde «Nur Otan» da ulttyq qundylyqtarymyzdy dáripteitin is-sharalardy qoldap, onyń nasihattalýy men damýyna barynsha úles qosyp keledi...Biz bolashaqta úlken jetistikterge jetemiz desek, ulttyq qundylyqtarymyz arqyly halqymyzdyń rýhyn kóterýimiz kerek. Bul baǵytta Prezident Qasym-Jomart Toqaev naqty tapsyrmalar berdi», – dep atap ótti Baýyrjan Baibek.
«Nur Otan» partiiasynyń Nur-Sultan qalalyq filialynyń tóraǵasy-Nur-Sultan qalasynyń ákimi Altai Kólginov óziniń quttyqtaý sózinde terme men jyr keshine kelip, ulttyq ónerdi qoldaǵan qaýymǵa alǵys bildirdi.
«Tuńǵysh Prezident – Elbasy Nursultan Nazarbaevtyń tarihi sheshiminiń arqasynda búginde Nur-Sultan qalasy qarqyndy damyp, beibitshilik pen birlikti nasihattaityn jáne sony ispen dáleldeitin álem tanyǵan astanaǵa ainaldy. Qazir bas qalamyzda 1 mln 200 myńǵa jýyq halyq bar. Turǵyndardyń sany artyp keledi. Mysaly, 1998 jyly Tselinogradta taza qazaq tilinde oqytatyn bir ǵana mektep boldy. Qazir qazaqtildi 36 mektep bar. Jalpy 88 bilim ordasynyń qalǵany aralas mektep. Bul – tilimiz ben dilimiz qaita oraldy degen sóz. Elbasy saiasaty men kópultty memleketimizdiń birliginiń arqasynda osyndai jetistikterge jetip otyrmyz. Qazirgi ýaqytta Prezident Qasym-Jomart Toqaev mádeniet salasyna, ulttyq qundylyqtarymyzdy qoldaýǵa jaǵdai jasap, bizdiń aldymyzǵa naqty mindetter qoiyp otyr», – dedi Altai Kólginov.
«Jyr-amanat» jyrshy-termeshiler keshi tuńǵysh ret erekshe formatta ótti. Ol kontsert pen spektakl janrlaryn ushtastyrdy.
Al keler jyly «Jyr-amanat» kontsert-spektakli partiianyń qoldaýymen Elorda kúnine orai «Esildiń jaǵasynda jarqyraidy bir qala» taqyrybynda uiymdastyrylmaq.
Aita keteiik, biyl kúzde «Nur Otan» partiiasynyń qoldaýymen, elimizdiń birqatar óńirinde aitys festivalderi uiymdastyryldy. Aitys óneriniń dodasy 16-17 jeltoqsanda Oral qalasynda ótetin «Altyn dombyra» respýblikalyq festivalinde máresine jetedi. «Nur Otan» partiiasynyń janyndaǵy «Miras» respýblikalyq qoǵamdyq keńesi músheleriniń bastamasymen memlekettik tildi damytý tetikterin pysyqtaý úshin arnaiy komissiia qurylǵan bolatyn.
