Búgin Astanada QR Premer-Ministriniń orynbasary Imanǵali Tasmaǵambetovtiń tóraǵalyǵymen Qazaqstan Respýblikasynyń Ulttyq brendin anyqtaý boiynsha baiqaýdyń sarapshylyq keńesiniń otyrysy ótti.
Qazirgi ýaqytta óńirlik brending kóp jaǵdaida memlekettiń týristik jáne investitsiialyq tartymdylyǵynyń deńgeiin anyqtaidy, olardyńń ónimderiniń tanymaldyǵyn arttyryp, halyqaralyq arenadaǵy bedeline jáne ǵalamdyq eńbek bólinisindegi ornyna yqpal etedi.
«Sońǵy jyldary álemde vizýaldy grafika keńinen qoldanylýda. Adamnyń 80 paiyzy aqparatty kórý arqyly alady. Kásibi marketologtar burynnan beri óz jumystaryn osy qaǵidanyń negizinde júrgizip keledi. Sondyqtan, búgingi tańda málimetti tez uǵyný úshin infografika, foto-videosy bar materialdarǵa basymdyq berilýi kezdeisoq emes», - dep atap ótti otyrys barysynda vitse-premer Imanǵali Tasmaǵambetov.
Eske sala keteiik, Qazaqstannyń halyqaralyq arenadaǵy oń kelbetin qalyptastyrý jáne tanymaldyǵyn arttyrý, qazaqstandyq erekshe týristik oryndardy aqparattyq qoldaý, sheteldik investitsiia tartý maqsatynda uiymdastyrylǵan Qazaqstan Respýblikasynyń Ulttyq brendin anyqtaý boiynsha Respýblikalyq baiqaý 31 tamyzda bastaldy. Baiqaýǵa qatysýshylardan Qazaqstannyń álemdik keńistikte tanymaldyǵyn arttyrýda qoldanylatyn logotip nemese emblema jobasyn jáne oǵan uran sózdi qosa usyný talap etildi.
Uiymdastyrý komitetine azamattardan barlyǵy 1000-nan asa joba kelip tústi. Qazirgi ýaqytta baiqaýdyń I kezeńi – internet qoldanýshylarynyń daýys berýi aiaqtaldy. Onyń aiasynda qazaqstandyqtar ózderine unaǵan jobaǵa daýys berdi. Ekinshi kezeń – internet daýys berý nátijesinde iriktelgen úzdik jobalar Sarapshylyq keńeste tanystyryldy.
Atap aitqanda, Sarapshylyq keńestiń qaraýyna daýys berý nátijesinde eń kóp daýys jinaǵan 40 jumys usynyldy. Sarapshylar bulardyń ishinen úzdik 10 jobany tańdap alady. Baiqaý erejesine sáikes Qazaqstan Respýblikasynyń Ulttyq brendi – resmi logotipi men urany qalyń kópshilikke tanystyrylady.
Sarapshylyq keńes quramyna tanymal saiasat jáne qoǵam qairatkerleri, memlekettik organdar ókilderi, mádeniet pen óner qairatkerleri kiredi.
Sarapshylyq keńestiń sheshimimen kelesi otyrys týra bir aidan keiin ótkiziledi, onda usynylǵan finaldyq jobalar qaralady.
"Ult aqparat"
