Nazarbaev Ýniversitetinde Qazaqstan triatlon federatsiiasynyń (QTF) jyl saiynǵy kongresi ótti. "Ult aqparat" bul týraly QTF-ke silteme jasap habarlaidy.
Kongress QTF prezidenti Kárim Másimovtiń tóraǵalyǵymen ótti. Kongreske QR Mádeniet jáne sport ministri Aqtoty Raiymqulova, mádeniet jáne sport vitse-ministri Eldos Ramazanov, QR Ulttyq Olimpiadalyq komitetiniń bas hatshysy Sáken Musaibekov, Sport jáne dene shynyqtyrý isteri komiteti tóraǵasynyń orynbasary Serik Jarasbaev, elorda ákimi Altai Kólginov, baqylaýshy keńes tóraǵasy-ERG tobynyń bas atqarýshy direktorynyń birinshi orynbasary Aldiiar Qaztaev jáne taǵy basqalar qatysty.
Otyrys barysynda federatsiianyń jańa prezidenti sailandy. Ókilettilik merziminiń aiaqtalýyna bailanysty Kongress músheleri jańa prezidentti jáne birinshi vitse-prezidentti ashyq daýys berý jolymen sailady. Jiynǵa qatysýshylar Aldiiar Qaztaevty biraýyzdan QTF-tiń jańa prezidenti etip sailady. Al Kárim Másimov QTF Qurmetti prezidenti bolyp sailandy. Ortalyqaziialyq triatlon qaýymdastyǵynyń (SATA) prezidenti jáne Almaty Triathlon Federation basshysy Ǵalymjan Esenov QTF birinshi vitse-prezidenti boldy.
Eske sala ketsek, K. Másimov QR triatlon federatsiiasynyń prezidenti bolyp 2016 jyly sailanǵan edi. Onyń basshylyǵymen qazaqstandyq triatlon josparly ári keshendi damý jolynan ótti. Dálirek aitqanda, uiymnyń normativti-quqyqtyq bazasy jetildirildi, federatsiianyń jumysyn basqaratyn profildi komitetter quryldy, basty halyqaralyq triatlon uiymdarymen (ITU, ASTC, Ironman (WTC)) jaqsy qarym-qatynas ornatyldy, el aimaqtarynda akkredittelgen federatsiialar, olimpiadalyq rezervtegi balalar-jasóspirimder mektepterinde triatlon bólimsheleri men sektsiialary ashyldy, Nur-Sultan, Almaty jáne Shymkent qalalarynda ITU, ASTC, Ironman birlesken aýqymdy halyqaralyq saiystar ótkizildi, elimizdiń barlyq derlik aimaqtarynda respýblikalyq deńgeidegi saiystar uiymdastyryldy, úlken halyqaralyq dodalarda ulttyq qurama músheleri jaqsy nátijeler kórsetti, jáne de ádestemelik qujattar shyǵarylyp, bilikti bapkerler tárbieleý isinde de birshama jetistikterge qol jetkizildi. Sonymen qatar, áýesqoilyq triatlonnyń damýyna úlken serpilis bergen «TEMIRADAM» Kýbogi quryldy. K. Másimovtiń basshylyǵy kezindegi federatsiianyń basty jetistikteri retinde QTF ókilderiniń Aziialyq triatlon konfederatsiiasynyń (ASTC) Atqarýshy keńesine jáne profildi komitetterine daýys berý quqyǵymen sailanyp engendigin, Qyrǵyzstan, Ózbekstan, Iran, Aýǵanstan jáne Qazaqstan sekildi bes eldiń ulttyq federatsiialaryn biriktirgen Ortalyqaziialyq triatlon qaýymdastyǵynyń (SATA) qurylýyn ataýǵa bolady.
«Búgingi tańda qazaqstandyq triatlon óz damý jolynda úlken serpilis jasady. Federatsiia aitarlyqtai jetistikterge qol jetkizdi. Bul, birlese atqarǵan jumys pen dana basshylyqtyń arqasynda ekendigin senimdi túrde aitýǵa bolady. Ulttyq federatsiianyń basqarý úlken abyroi ári jaýapkershilik. Bizdiń triatlonǵa júieli ári keshendi ósim qamtamasyz ete otyryp, qalyptasqan dástúrdi saqtaý kerek. Bul úshin barlyq kúshimdi jumsaýǵa niettimin», - dedi Aldiiar Qaztaev.
Budan basqa Kongreste federatsiianyń ótken jyly atqarǵan jumysy boiynsha esep tyńdalyp, kele jatqan olimpiadalyq maýsymǵa negizgi maqsattar qoiyldy.
