Qazaqstannyń 4 oblysynda paidalanylmaityn 8,3 mln gektar jer anyqtaldy. Bul týraly Úkimet otyrysynda QR Aýyl sharýashylyǵy ministri Saparhan Omarov aitty, dep habarlaidy QazAqparat.
«Memleket basshysynyń jerlerdi aýyl sharýashylyǵy ainalymyna tartý jónindegi tapsyrmasy aiasyndy Jerdi qashyqtyqtan zondtaý arqyly aýyl sharýashylyǵy jerleriniń paidalanylýyna memlekettik baqylaý júrgizýge múmkindik beretin ǵaryshtan monitoringteý jónindegi pilottyq joba júrgizilýde. 2020 jyly pilottyq óńirler retinde Aqmola, Shyǵys Qazaqstan, Qostanai jáne Mańǵystaý oblystary aiqyndaldy», - dedi ministr.
Saparhan Omarovtyń aitýynsha, pilottyq óńirlerdi ǵaryshtyq monitoringteýdiń birinshi kezeńiniń derekteri boiynsha 8,3 mln gektar paidalanylmaityn jer anyqtaldy. Onyń ishinde 2,6 mln gektar jaiylym erikti túrde memlekettik menshikke qaitaryldy. 5,7 mln gektar jer ielerine buzýshylyqtardy joiý týraly habarlama jiberildi.
«Osy jobany júrgizý barysynda ministrlik jerdi utymsyz paidalanýdy aiqyndaý ádisnamasyn odan ári jetildirý úshin jergilikti atqarýshy organdarmen birlesip pilotqa jáne onyń nátijelerine taldaý júrgizýde», - dedi ol.
