QR Syrtqy ister ministri Muhtar Tileýberdi Imanǵali Tasmaǵambetovtyń Elshi qyzmetinen bosatylýyna qatysty pikir bildirdi, – dep habarlaidy «Ult aqparat».
Úkimet otyrysynan keiin BAQ ókilderiniń saýalyna jaýap bergen ministr, Qazaqstannyń Reseidegi Tótenshe jáne Ókiletti Elshisi Imanǵali Tasmaǵambetov ketkennen keiin onyń qyzmetin ýaqytsha kim atqaratynyn aityp berdi.
«Keńesshi-elshi atqarady. Keshe arnaiy buiryqqa qol qoidym. Nurjan Qajiaqbarov Elshiliktegi ekinshi adam, oǵan Resei Federatsiiasyndaǵy Qazaqstan Respýblikasy isteriniń ýaqytsha senimdi ókili mindeti júkteldi. Nurjan Qajiaqbarov jańa Elshi taǵaiyndalyp, Resei Prezidentine senim gramotasyn tapsyrǵanǵa deiin mindetin atqaratyn bolady», - dedi ol.
Ministr BAQ ókilderiniń Imanǵali Tasmaǵambetov Syrtqy ister ministrligi júiesinde qyzmetin jalǵastyra ma degen saýalyna da jaýap berdi.
«Ol zeinet jasyna jetýine bailanysty óz erkimen jumystan shyqty. Sondyqtan da meniń túsinýimshe, ol SIM júiesinde qalmaidy» dedi M.Tileýberdi.
Buǵan deiin Memleket basshysy Qasym-Jomart Toqaevtyń Jarlyǵymen Imanǵali Nurǵaliuly Tasmaǵambetov zeinetkerlik jasqa tolýyna bailanysty Qazaqstan Respýblikasynyń Resei Federatsiiasyndaǵy Tótenshe jáne Ókiletti Elshisi qyzmetinen bosatylǵanyn habarlaǵan edik.
