© Photo: Astana qalasy ákimdiginiń baspasóz qyzmeti
Tótenshe jaǵdailar birinshi vitse-ministri Ibragim Kúlshimbaev ministrliktiń materialdyq-tehnikalyq jabdyqtalýy týraly aitty, dep habarlaidy Sputnik Qazaqstan.
Onyń aitýynsha, búginde eldi mekenderdi órtten qorǵaityn 426 órt sóndirý bólimi jumys isteidi.
"Biraq bul jetkiliksiz, normativqa jetý úshin áli 121 órt sóndirý bólimin salý kerek. Josparda bar. Búgingi kúnniń ózinde jol kartasy boiynsha Qazaqstanda 21 órt sóndirý beketiniń qurylysy júrip jtyr. Qarap otyrsaq, sońǵy on jylda 18 nysan ǵana salynǵan. Byltyrǵy jyldardan bastap osy jumystardy kúsheite bastadyq", - dedi Kúlshimbaev Senat otyrysynda.
Ol TJ ministrliginiń tehnikamen jabdyqtalýy 80 paiyzdy quraitynyn atap ótti. Qazir 3200 tehnika bar, áli 430 tehnika qajet. Onyń ishinde 15 paiyzynyń nemes 470 tehnikanyń merzimi jiyrma jyldan asyp ketken.
"Osynyń bárin sheshý úshin prezidenttiń tikelei tapsyrmasymen keshendi jospar qarastyrylǵan. Búgingi kúni osy keshendi josparǵa barlyq ortalyq memlekettik organ kelisimin berip, qol qoiý satysynda tur. Sol boiynsha naýryz aiynda respýblikalyq biýdjet komissiiasynyń otyrysynda qaralyp, 605 mlrd teńge qarjy bólinip otyr. Sonyń ishinde 536 mlrd tótenshe jaǵdailar ministrligine, 48 mlrd teńge ekologiia ministrligine, jáne 20 mlrd teńge jergilikti ákimshilik organdaryna", - dedi vitse-ministr.
Aitýynsha, áýe qutqarý júiesin damytý úshin sońǵy úsh jylda 11 tikushaq satyp alyndy. Keshendi jospar boiynsha 2027 jylǵa deiin 16 tikushaq alý josparlanyp otyr.
"Keshendi josparda áleýmettik jaǵdailar da kózdelgen. Biyl órt sóndirýshilerdiń jalaqysy jetpis paiyzǵa deiin kóterildi, jospar boiynsha páteri joq qyzmetkerler ótemaqy tóleý úshin aqsha qarastyrylyp otyr", - dedi Kúlshimbaev.
