Qazaqstandyq meditsinalyq uiymdardyń 70% ulttyq akkreditatsiia talaptaryna sai emes.
Bul týraly QR DSM Densaýlyq saqtaýdy damytý respýblikalyq ortalyǵynyń bas direktory Ainur Aiyphanova málimdedi, dep habarlaidy QazAqparat.
Onyń aitýynsha, Qazaqstandaǵy akkreditatsiialaý ulttyq júiesi 2009 jyldan beri jumys istep keledi. Bul júieni Densaýlyq saqtaý sapasy boiynsha halyqaralyq qaýymdastyq moiyndaǵan.
«Biz aýrýhanalar men emhanalardyń jumys tártibi men standarttaryn oilastyrdyq jáne bul standarttardy aǵylshyn tiline aýdaryp, 4 jylǵa halyqaralyq sertifikat aldyq. Osylaisha, 2009 jyldan beri úsh ret akkreditatsiia standarttaryn bekittik. Qazir 2018 jyly bekitilgen standarttar boiynsha jumys istep jatyrmyz. Munda aýrýhanalarǵa, emhanalarǵa jáne meditsinalyq uiymdarǵa jertóleden shatyrǵa deiin, medbikeniń dárini ázirleýi, dárigerdiń em taǵaiyndaýy boiynsha 500-den astam talap qoiylady», - dedi Ainur Aiyphanova Respýblikalyq densaýlyq saqtaý ortalyǵynda ótken kezdesýde.
Ókinishke qarai, qazirgi ýaqytta Áleýmettik meditsinalyq saqtandyrý qory arqyly memleketten qarajat alatyn otandyq meditsinalyq uiymdardyń 30% ǵana ulttyq akkreditatsiiadan ótken.
«Bul qalǵan 70% daiyn emestigin nemese standartqa sai kelmeitindigin kórsetedi. 2018 jyly akkreditatsiia talaptary taǵy kóterildi jáne kóptegen uiymdar synaqtan ótpei qaldy. Máselen, biyl árbir besinshi uiym akkreditatsiiadan ótpei qaldy. Olardyń daiyndyǵy tómen boldy jáne barlyq talaptarǵa sai bola almady. Bizdiń akkreditatsiia úsh sanatta beriledi: joǵary sanatta Qazaqstanda 10 uiym ǵana bar. Olardyń arasynda astanalyq UMC, Shymkenttegi oblystyq aýrýhana bar. Bul uiymdar standarttardy barynsha sapaly engizip, dárigerler men medbikelerdiń qyzmetin durys uiymdastyra bildi», - dep atap ótti ortalyq basshysy.
Ázirge ulttyq akkreditatsiialyq júie erikti bolyp sanalady jáne ministrlik 2024-2025 jylǵa qarai mindetteý úshin ýaqyt berýdi usynyp otyr.
«Memleketten aqsha alǵyń kelse - naýqas úshin qaýipsiz, sapaly orta jasa. Onyń ústine, mekeme Mindetti áleýmettik meditsinalyq saqtandyrý aiasynda qarajat alsa, barlyq talaptarǵa sai bolýy tiis. Bizdiń júieni álem moiyndady. Sapa boiynsha halyqaralyq qaýymdastyq AQSh-taǵy JCI, «Accreditation Canada» syndy 20 uiymdy ǵana akkredittegen. Sol tizimde Qazaqstannyń Respýblikalyq densaýlyq saqtaýdy damytý ortalyǵy bar», - dedi A. Aiyphanova.
